Midang sualnak tu pei ka rak kawl diam hi

Sweet December tiah sunsak khun mi nicaan ah kan phan cang. Thla (10) leng vawleipi zawtnak ruang ah Erkhumh kan si cang caah thin a tawi, thluak a fak, kan khuaruahnak, thinlung put le cawlcangh vialte aa phundang dih cang. Hliphlau khawh a har. Cu bantuk boruak nih Christmas boruak zong a hnosuan nak a tam ko lai.

Kanun ka check tthan, Thla(10) chung ka rak tuah mi le ka thinlung put vialte ka zoh tthan. Keimah tlaknak, thangchiatnak le congawih nak a tuah tu vialte lawmh ter ding tiah biachahnak ka rak ngeih mi a um. Cu caah a dik lo ningin keimah kongchia a chimtu pawl, ka chiatnak a chim tu pawl, ka tlamtlin lonak a kawl tu minung pawl hna sining ka ngiat ve. Pumpak an thinlung muru, thil ti khawhnak le fimnak ti bantuk thup pi in ka thei lo, purh dah ka tim ve lo. A si nain mibu karlak an cawlcangh, an biachim ti bantuk hna cu ka rak ngiat len. Ka rak i timh mi cu keimah tlaknak rumro a tuah tu, a kawltu an si caah dawtnak in ka lehrulh hna lai, an chiatnak le tlamtlin lonak ka hmuh sual ahcun ka dirkamh colh hna lai ti kha a rak si.

A si nain cucu ka rak palh diam. Dawtnak in midang lehrul, midang cungah dawtnak langhter timi kha a lam ka rak palh i an thatnak tu rak kawl loin an chiat nak le tlamtlin lonak tu ka rak kawl ve diam. Dawtnak ka langhter lai, thatnak in lehrulhnak ka tuah lai timi ka tlangtar cu a rak ttha ngai, a si nain midang sualnak tu pei ka rak kawl diam hi timi kha ka rak hngal lo.Khrihfa mi kan i cawnpiaknak, nun kan i chimhnak ah Tlangtar a ttha ngai kho nain a zulh ning lam tampi kan palh sual kho. Kan Bawipa Jesuh Khrih cu Vawlei khamhtu ding ah a rak chuak.

Vawlei ah daihnak, remnak um ko seh tiah vanmi nih hladawh in an hlawi. Mi vialte an i lawmh lio ah Herod siangpahrang nih cun a sualnak lawngte a rak kawl, thah ding in a dawi zungzal ko. Khuaruah har thil a tuah mi ruang ah mi vialte nih kan Bawipa Jesuh an thangthat, a si nain Pontius Pilate nih cun Vailam ah thlai uh tiah Order a pek i an thlai.Thla(10) chung vawleipi pulrai ruang ah harsatnak tampi kan tong cio hna lai.Chung sivang le thluakfak in kan um caan a tam ko lai. December thla kan phan, kan khamhtu Bawi Jesuh Khrih a chuah thla a si cang.

“ISAIAH 9:6 Kan caah ngakchia pakhat a chuak! Fapa pakhat pek kan si! Amah cu kan uktu bawi a si lai. Amah cu Khuaruahhar Fim Chimtu, A Thawngmi Pathian, Zungzal Hmunmi Pa, Daihnak Bawi, ti a si lai”.Daihnak, remnak um cio cang hram seh. Kan thinlung in Lainawng hlah uhsih, Mi congawihnak, mi that lonak kawlnak lei si loin midang thatnak kawl uhsih law mi vialte karlak ah remnak ser i zuam usih.  Pathian nih thluachuah in pe hna seh.

Biakilh: Sermon a si lo, Article zong a si lo, lungchuak tawi ka tial lai ka ti nain a sau pah sual. A ka rel piaktu nan dihlak cung ah kaalawm.Credit-Salai Cung Dawt

Be the first to comment

Leave a Reply

Your email address will not be published.


*