Midang nun fir le tlaihhrem ttih a nungzia

Zabu 16/17/18 hrawngah vunrang pawl nih vundum (vunnak) pawl nun cu an fir an tlaihhrem i sal ah kum saupi an tuah hna. Midang nun fir le tlaihhrem cu an duh na lo buin anmah hlawknak le miaknak ca lawngah rianttuanter le hrem khi a sawh duhmi a si kko. Midang nun fir le tlaihhrem cu nuhrin covo upat lo le zeirel lo zong a si fawn. An si a fah zongah zalong tein anmah pum cawmnak caah a buai lengmang vemi nun va fir riangmang i kanmah ca tthatnak le hlawknak ding ca lawngah hehtiah sal bantuk uk i rianttuan ter cu mizei hmanh nih an pom ti lo. Khrihfa cawnpiaknak he zong a kalh tuk. Upadi he zong a kalh tuk.

Ralkap bawi, Ne Win nih kum 1962 ah Kawlram mipi nun cu a fir ve i a tlaihhrem. Ralkap pawl nih amah hnu an zulh peng ve i nihin tiang Kawlram mipi kan nunnak cu firpiak le tlaihhrempiak kan si. Tlaihhrem kan ti cu anmah duhnak le hlawknak le miaknak le nuamhnak ca men lawngah an kan hmang. An firmi le an tlaihhrem mi kan nun cu sal ah an tuah i an hrawk dih cikcek. Kan nuhrin covo zong zeiah an kan relpiak lo. Kan nun cu an duh le an thah men i an duh le thongah an thlak men ko. An duh le an i nuamhpi i an duh le an khangh men ko. Kan nunnak cu an thilri pakhat bantuk men lawngah an ruah. Kan nunnak cu lente celhnak men ah an hmang. Zeitluk in dah midang nun fir le tlaihhrem ttih a nung, nan i fiang dih cio ko lai dah ka ti.

Nihin Laimi Khrihfa lak zongah vunrang pawl nih vunnak pawl nun an fir i an tlaihhrem bantuk le Kawl ralkap nih Kawlram mipi nun an fir i an tlaihhrem bantuk in a ttha tuk komi le amah umte i a um ziar komi le a ding komi nun va fir i va tlaihhrem piak kan hmang tawn ve. Hi bantuk midang nunnak ah hehtiah va hrolh le va thlak le va uk le mah duhpoah in tuah le umter hi ttih a nung tuk i kan tuah bantuk tein kan tuar colh lengmang ve ko lai. Kanmah nih kan tuar lo hmanh ah kan fale nih an tuar ve thotho ko lai. Midang nunnak ah hna va hnawh len le thil ttha lo le harnak a phunphun va pek ti bantuk hi Laimi tampi zong kan hmang ve. Myint Aung Hlaing bantuk kan si ve tinak a si ko.

Midang nunnak firpiak le tlaihhrempiak a timtu pawl nih cun midang nunnak fir le tlaihhremnak ding caah a phun2 in tthat lonak an tuah lai i hriamnam an hmang len ko lai. Kannih kan tthawng deuh i kannih kan tamdeuh caah tiphun in midang nun va fir i va tlaihhrem le va uk le duhpoah in tuah a hmangmi nihin ah kan tamtuk rih. Mah bantuk ruahnak le thiltuah a hmangmi cu Khrihfa ttha an si kho bel lo i tehte ttha zong an si kho bel lo. Thluachuah hmumi an si bel fawn lo. Miding an si kho bel fawn lo. Midang nih huatmi deuh an si peng fawn.

Keimah pumpak ka nunnak zongah ka nun hi fir le tlaihhrem a zuammi an um lengmang ve. Asinan Bawipa Pathian sinah thla ka cam i hehtiah bawmh ka hal. Pathian nih ka nun, fir le tlaihhrem a timtu pawl cu dan a tat lengmang ve tawn hna. Ka nun an fir caan le an tlaihhrem caan zong a um ve. Nanmah cio zong nan si ve ko lai. Asinan Bawipa nih ka nun cu a chanh lengmang ve ko David siangpahrang bang in. Ka nun, fir le tlaihhrem le duh paoh in hmang a timtu pawl cu fak piin dantat le hrem an si venak lai hehtiah Pathian sinah thla ka cam lengmang ve. Midang nih na nunnak kha a phunphun in fir le tlaihhrem an timh caan a tampi ve ko lai. Cucaah Phungthlukbia cauk nih a ti bang in ralring te le fimkhur tein le Bawipa i bochan bu tein kan um peng a hau.

Myint Aung Hlaing le ralkap pawl nih firpiak le tlaihhrempiak a tongmi, nan nunnak vialte cu a rauh hlanah Bawipa Pathian nih luatnak le teinak in pe ko hna seh. Kan der deuh zongah Pathian kan lei i a ttan ahcun ahohmanh nih an kan tei kho lai lo. Myint Aung Hlaing bantuk in midang nunnak firpiak le tlaihhrempiak a hmangmi na si ve sual maw? Hawi dawt rak i ruat tuah.Credit-Van Tum

Be the first to comment

Leave a Reply

Your email address will not be published.


*