“Mara” hi “Lai” a si maw? “17. 01. 2021 C. Laiki (Maung Thitsan)

The Lakhers” timi Mara pawl kong a tialtu N.E. Parry nih Mara Holh hi “Lai Holh he a nainiam ngaimi a si i, Lai Holh hi Tlongsai Lakher (Tlongsai Mara) Holh hrampi ti ding a si ko” tiah a tial. (The Maras speak a language closely akin to Lai and, Lai is said to be the parent of Tlongsai Lakher dialect(Parry, 1932).  Mara miphun kong a tialmi tampi nih Mara hi Lai miphun a si ve taktak maw, an holh hi a khat taktak maw, timi hlathlainak (research) tuah ti loin Mara kong a tial hmasa bikmi N.E. Parry tial ciami kha khawpi (copy) tuah thluahmah in Mara cu miphun dang a si lo, Lai miphun ah a telmi miphun hme pakhat a si ve tiah an tial dih cio ve.

Lian H. Sakhong tialmi”The Origin of the Chin” timi research paper ah”The Mara group of Laimi tribe also known as theLakher (Lakher tiin hngalhmi Lai miphun a simi Mara bu) was recorded by N.E. Parry in 1932″ tiah a tial ve. U Ne Win chan Revolutional Council (1962) ah an chuakmi Kawlram miphun pawl Nunphung le Chuahkehnak kong tialnak zong ah Mara cu Lai (Hakha) miphun ah an telh ve. Professor L. H.Chhuanawma, Department of Political Science, Pachhunga University College, Mizoram University nih”International Journal ofCreative Research Thoughts” caah “Ethnic Affinities between Pawi (Lai) andbLakher (Mara) Tribes” timi Research paper a tialmi ah a tlangpi deuh in point (3) a langhtermi cu –

(1). Chuahkehnak hmun a khatnak.
“Mizoram ah a ummi Lakher (Mara) le Pawi (Lai) pawl hi Chin State,Myanmar in a rami lawng an si”, a ti. (Parry, 1932). “Chin State chungah a ummi Hakha hi hlanlio Pawi (Lai) pupale an rak umnak hmun a si”, a ti.

(Hengmanga 1982),Doungel 2015). (2). Bawi pawl (chiefs).Mizoram a ummi Mara bawi pawl hi Lai Phun a simi “Chinzah (Mara holh in Chozah), Hlawnching(Mara holh in Hlychho), Bunghai (Mara holh in Bohia), tbt. an si. Remark. “Chinzah” hi catialtu hmanning a si,”Cinzah” ti ding a si.Cun atu MADC khuapi Siaha (hlanlio Saiha) le Saikao (hlanlio Serkawr) hna khi Lai bawi pawl dirhmi an si. Saiha khi Alkheng Hlawnching (Mara holh in Iakhai Hlychho) nih a dirhmi a si i Serkawr (Saikao) khi Lianchi Hlawnching (Mara holh in Laichi Hlychho) nih a dirhmi a si a ti. Mara History tialtu C. Haoko nih cun”Saikao bawi cu Iakhai (Alkheng) a si”, a ti.

(3). Holh N.E. Parry nih “Mara holh cu Lai holh he a nainiam ngaimi a si i, Lai holh hi Tlongsai Lakher (Tlongsai Mara) holh hrampi ti ding a si ko” tiah a ti. Hi ruangah Mara holh le Pawi (Lai) holh cu a khatmi a si ko, a ti. Amah lawng a si lo, Chin miphun kong a tialmi tampi nih N.E. Parry tial ciami hi an khawpi (copied) i Mara cu Lai miphun ah an telh dihmi cu tuchan mino pawl zong nih a hmanmi Source ah lak in Mara cu
Lai pei a si ve ko cu tiah fawi tein an chim lengmang cio ve.

Zeibantuk miphun dah a si timi hlathlainak hi “Holh” (Language) sining zoh in țhenmi a si. Holh in hlathlaimi a si caah holh tampi sining a thiammi “Linguist” (Linguistics Mifim) pawl nih a sining taktak an hngalh khawh.Linguistics thiamsangmi si lo ahcun “Holh” in hlathlainak (research) tuah loin khuasanak hmun a khatnak, phun (clan) min auhnak, minsaknak le holh a lonak tete tbt. zoh in an siter duh ningin biachim le catial cio a si ko.

Dr. Lian Hmung Sakhong hi Linguistics Ph. D. a si lo, Theology Ph. D. a si.Professor L.H. Chhuanawma zong Linguistics DepartmentProfessor a si lo, Professor of Department of Political Science a si.Anmah nih Mara cu Lai a si ve ko an timi hi holh sining Research (hlathlainak) tuah in an chimmi a si lo, The Lakhers cauk tialtu N.E.Parry tial ciami kha an khawpimi (copied)  a si.Midang pawl zong N.E.Parry ta hi an rinh dih ve. Mara le Pawi pawl umnak hmun hi a nainiam lawng si loin an holh zong a lomi a um pah caah N.E. Parry nih Lai Holh hi Mara Holh hrampi ti ding a si ko, a timi a si ko.N.E. Parry nih Mara Holh le Lai (Pawi) Holh Research a tuahnak a um lo. Ca in a tialmi te a si.

Hlanlio ah cun khua khat le khua khat raldoh a rak si. A țhawng deuhmi khua nih a der deuhmi khua kha sal ah tlaih dih chan a si caah michia-zaran lawngin khuasa ngam a si lo. An khuapi himnak caah ralțhami le a țhawng deuhmi phun pawl hi bawi (chief) caah an lak hna. An khuapi hnangamnak le himnak ca a si caah zeibantuk miphun (clan) thengmang ti si loin bochan awktlak miphun poh bawi caah ilak khawh a si. Cucaah ral in a kan himter khawh lai tiah zumhmi Lai miphun chungin “Cinzah”

(Mara in Chozah), Hlawnching (Mara in Hlychho), Zathang (Mara in Zawtha), tbt. bochan awktlakmi phun pawl hi Bawi (chief) in an lakmi a si. Professor L.H. Chhuanawma nih Serkawr le Saiha hi Lai bawi (Lai chiefs)”Lianchi Hlawngching” le
“Alkheng Hlawnching” nih an dirhmi khua pawl an si a ti nain Mara History tialtu C. Haoko nih cun “Tlongsai pawl(Tlongsai Mara pawl) rawnpi an khuasanak hmun in Serkawr (atu Saikao) le Saiha (atu Siaha) tiin khua hnih in a țhenmi an si i, Tlongsai Indong (250) cu an bawi Alkheng II (Mara Iakhai 2na) nih Serkawr (Saikao) khua cu a fuhpi hna” a ti. Hi ningin cun Alkheng nih a dirhmi si loin a mipi he hmun khat te-ah an umti, hmun khat tein Serkawr an fuhti tinak a si. Tongsai Mara khuami nih Alkeng Hlawnching cu bawi ah an lakmi a si timi cu a fiang ko. Cuve bantukin Lianchi (Lianci) zong Tlongsai Mara nih bawi caah a lakmi a si ve tinak a si. Hlanlio raldoh chan a si caah bawi ngei loin hnangamnak a um kho lo, khuasa ngam a si lo ruangah an khua a himter dingah bochan awktlak a simi Lai miphun chungin “Hlawnching phun nih Tlongsai Mara bawi a si khawhnak a si.

Cu lawng si lo, Marami tambik chuahkehnak hlanlio “Ngaphai” (atuNgaphaite) bawi Mang Hlei Cinzah (Mara in Mahlie Chozah) zong Thantlang Cinzah bawi a si ve. Ngaphai bawi hi Lai miphun a si caah Ngaphai zong Lai khua a si ve ti khawh a si lo, bawi caah a laktu hi Mara miphun “Ngaphai Mara khua) a si. Serkawr le Saiha bawi pawl cu Lai miphun, Hlawnching phun (clan) an si i, bawi caah a laktu cu Tlongsai Mara a si ve. Bawi an ngei hlan-ah Mara miphun an um hmasa cang timi hngalh ding a si. Bawi pawl cu Lai miphun an si caah Mang Hlei Cinzah, Lianci Hlawnching, Alkheng Hlawnching, ti an rak si nain Mara miphun chungah kum saupi an um tikah cun “Mahlie Chozah, Laichi Hlychho,Iakhai Hlychho, tiah Mara awchuak ningin an min zong a thleng dihmi a si.
Cucaah phun (clan) a lomi tlawmpal ruangah Mara le Lai (Pawi) hi miphun khat an si ti khawh a si lo, Lai phun he a khat lomi Mara phun tampi an um ve. Chin State, Myanmar in a rak chuakmi lawng an si caah a khatmi timi hi Chin State chung ummi
Kuki-Chin chung hmanh ah miphun tampi an um,cu a khat lomi miphun pawl ah Mara le Pawi zong a telmi an si ve.Hmunhma a khat ruangah Mara le Pawi hi miphun khat an si khawh a si lo.

Mara kong a tialmi tampi nih N.E. Parry tialmi rinh in Mara cu Lai miphun he a khat ko timi hi a hman taktak maw tiah,Tibeto-Burman Languages and Southeast Asia ram ah Linguistics minthang ngaimi James Alan Matisoff, Professor Emeritus of Linguistics, University of California, Berkeley, USA nih “Kuki-Chin Languages” pawl kha țha tein Research (hlathlainak) a tuah țhan tikah Mara Holh hi miphun dang pawl he a khat lonak, miphun dang deuh a sinak kha fiang tein a hmuh. Hi Mara Holh he a naimi Mara Holh phun ah fonh khawh dingmi timi Adjective Form caah biafang pakhat a hmuhchuakmi cu Mara – “Maraic” tiah min a sak. (The term Maraic was coined by Mastioff (2002). Cucaah Lakher (Mara) group caah hmang khawh dingmi “Maraic” biafang hi 2003 in hman hramthawk a si.

James A. Matisoff hmuhchuakmi Kuki-Chin Languanges pawl cu Kenneth Van Bik Ph. D.
Assistant Professor, California State University, FULLERTON College of Humanities and Sicial Sciences English, Comparative Literature and Linguistics ah a tuan liomi nih thuk deuh in Research a tuah țhan tikah -(1). Peripheral(2). Central (3). Maraic… tiah phun (3)
in a țhen hna.

Proto-Kuki-Chin1. Peripheral group timi hi Chaklei bu (northern group) le Thlanglei bu (southern group) tinak a si.a. Chaklei group ahhin -Thado le Sizang.. an si.b. Thlanglei group ahhin Khumi le Cho-Asho..an si.2. Central group ahhin -a. Lamtuk Thet (L. Thet)b. Lai – Hakha, Falam c. Mizo – Lushai, Hmar. ti a si.3. Maraic group ahhin -a. Mara b. Zotung c. Senthang.. an si. Figure 6. Ken Van Bik’s schema forProto-Kuki-Chin.

Kenneth Van Bik nih a fehtermi, Zophei Holh a holh (Zophei miphun a si) i, Chin miphun dang holh zong tampi a thiammi Pu Lian Uk (Advocate Lian Uk) zong nih a hman tiah a pompi vemi cu a tanglei bantuk a si.

Proto-Maraic1. Mara, Lautu, Zophei,2. Zotung,3. Senthang,… ti a si.Figure 11. Ken Van Bik’ssubgrouping schema for the Maraic group.Holh sining ah Mara Holh he a naimi holh pawl hiMaraic Group (Mara miphun bu) tiah min an saknak a si i, cu Mara Bu chungah a ummi Mara,Lautu, Zophei, Zotung,Senthang miphun hna hiLai an si lo, miphun dang an si timi cu LinguisticsResearch-maker Kenneth
Van Bik nih fiang tein a kan chim cang.

Kenneth Van Bik hi N.E. Parry, Dr.Lian H Sakhong,Professor L.H. Chhuanawma le adang catialtu pawl bantuk a si lo, amah hi Linguistics Ph.D. a ngahmi a si.The Berkeley Linguistics Department and the Sino- Tibetan Etymological Dictionary and Thesaurus Project caah”Proto-Kuki-Chin” timi

Research Paper tialtu a si i, Pages 626 a um. Hi”Proto-Kuki-Chin” timi Research Paper in Lai Chin miphun lakah Linguistics Ph.D. a la hmasa bikmi zong a si.Kuki-Chin miphun holh vialte research tuah in Holh Hlathlainak in Ph. D. dikari tiang a hmuhmi Lai miphun Kenneth Van Bik nih Mara cu Lai a si lo tiah fiang tein a kan chim cang caah hnathiang tein cohlan ding a si cang, hlan deuh ah Mara cu Lai a si ve ko an rak timi kha cu ruahnak le hmuhnak menmen in an chimmi a si, Linguistic Research in hmuhchuakmi a si lo timi hngalh cio cang u sih.

Mara Bu (Maraic group) Holh a holhmi unau rual hna ramchung, ramleng hmunkip a ummi an dihlak milu cu -1. Mara milu 75000 hrawng (by Rev. Victor Ve-u, MEC Moderator),2. Lautu 15000 hrawng (by Rev. Peng Thang,LABC President)
3. Zophei milu 15000 hrawng (By Rev. N. Za Thang, ZPBA General Secretary) 4. Zotung milu 50000 hrawng (By Pu Pa Baung,Rezua)5. Sethang milu 24000 hrawng (By Rev. Cung Nawl, SDO Director)
Nihin 2021 January 17 tiang milu dihlak cu –
179000 (Ting khat,thawng sawmsarih le
thawng kua hrawng) an si.

Hi Maraic Group an sinak hi Mara Sianghleirun Bu hruaitu pawl lungthin ah a vun lang i, Yangon ummi Zophei le Lautu Sianghleirun upa deuh pawl an sawm i Insein, Pu Ceu Mang umnak inn ah meting an tuah i cu ni 1999 October 17 ah”Lautu, Mara, Zophei Students Fellowship
(LMZSF) timi bu an dirh.

Chairman – Salai Van Peng Lian (Zophei)
Secretary – Angelus Laibaw U (Mara)
Treasurer -Salai Ni Hram (Zophei)
Members – 1.Salai Sang Hei (Lautu) 2.Salai Bawi Kung (Mara) 3. Salai Sang Hlei Mang late) Mara4. Miss Sui Hliang (Lautu)5. Miss Rem Vang (Mara)Hi ni ah ruahnak tampi a petu hi Pu Ceu Mang a si.

Hi kum hi Sports tuahnak ikomhnak (fellowship) an thawk i Ngaphaite khua ah nuam tein an hmangti.Cucu Maraic unau pawl komhnak hramthawk hmasanak a si. Cu lio ah cun Zotung le Senthang an itel kho rih lo.2010 March 2, Kalymyo, Zion Baptist Church ah Zotung le Senthang hna he tonnak an ngei i,cu ni thawk in Zotung,Zophei, Lautu, Mara, Senthang timi “ZZLMS” Bu cu tlamtling tein dirh a si cang. Cu hnu cun ram 2nak Delhi le Malaysia zong dirh a si ve. Ram 3nak belte a dir kho ti maw ka hngalh ti lo. USA ah an rak dirh nain an pehzulh ti maw ti zong ka hngalh ti lo. Linguistics Ph.D. Kenneth Van Bik nih Miphun khat a timi thawngpang thei hlan hrimhrim in unau rual an sinak lungthin hi 1999 Ocber in ci a kho cang ti khawh a si. Dr. KennethVan Bik nih unau rual an si timi fiang tein a langhter cang caah lunglomh awk ngaingai zong a si.

Mara Holh sining hi Kuki-Chin miphun hna sning he a khat lonak, a phundang deuhnak hi cafang pohpoh (every syklable) a.aw. e. i. o. u.ytimi Vowel pakhatkhai in a dongmi lawng a si. Lai Holh le a dang pawl cu “k. l. m. n. r. p,etc Cosonant in cafang a dongmi lawng an si.An chuahkehnak ram le hmun a khat lo nain Mara Holh bantukin ‘Vowel’
(a.e.i.o,etc) in cafang a dongmi ram le holh hna hi keimah hmuh khawh chung ah cun Holh (7) lawng an si. Cuhna cu -1. Hawaiin Language 2. Figian Language 3. Tahitian Language 4. Tongan Lanuage 5. Tavaluan Language 6. Samoan Language7. Mara Language

Hi holh (7) pawl hi cafang kip ah “vowel” in a dongmi lawng an si.Atu Maraic Group chungmi Sentgang, Zotung, Zophei, Lautu holh hna zong ‘vowel’ in cafang a dongmi lawng an si ve. A cancan ah”k, ng, etc ” awvhak a telnak hi Lai Holh a holhmi pawl he a cawhmi an si caah Lai Holh nihinfluence a tuah deuh i hi bantuk aw an chuahnak a si.

Cucaah Mara hi Lai a si maw timi biahalnak hi ilaklawh ding a um lo, buaipi ding zong a si lo,Linguistic Rseach-maker a si lomi pawl nih an ruahnak ah Mara cu Lai a si ko tiah an chim sawhsawhmi a si, atu Lai Miphun zong a simi Kenneth Van Bik nih Lingistics Ph.D. hmuhnak caah “Proto-Kuki-Chin”miphun Holh vialte sining Research a tuah i, Mara hi Lai a si lo, an holh sining ah phun dang a si a ti cang caah Mara cu Lai a si lo timi hi lunglomh tein cohlan ding a si ko. Hi Capar (Paper) ruangah biahman a kan chimhtu Dr. Kenneth cungah mawchiat ding zong a si lo bantukin hi capar tialtu zong phundang in ruat ding a si lo timi zong vun langhter ka duh.

Sources -1. N.E. Parry, The Lakhers,1932)2. Professor L.H.Chhuanawma, Department of Political Science, Pachhunga University College, International Journal of Creative Reseach Thoughts. Vol.8, Issue 8 August 2020.3. Lian H Sakhong, The Origin of the Chin.4. C. Haoko, Mara History (2008)5. Kenneth Van Bik,Proto-Kuki-Chin A Reconstructed Ancestor of the Kuki-Chin Languages. Vol.  8 in the STEDT Monograph Series: 2009-10.20.

Be the first to comment

Leave a Reply

Your email address will not be published.


*