Malaysia ummi kawi le pawl caah: UNHCR – RSD interview theih herhmi

Malaysia ummi Chin ralzaam tam deuh nih kan i fian tawn lomi cu UNHCR-RSD interview asi. UNHCR lei he pehtlai in REG, RSD, RST (DSU) tibantuk interview hi a um caah aa fiang lo zong kan um theo. Cucaah kan tuah dingmi interview hi zeibantuk interview dah asi ti zong theih a herh ngaingai. Kan tuah dingmi interview kan i fian ahcun zeidah kan i timhtuah lai le ruahcia lai ti zong a fawi deuh hnga.

RSD asullam cu Refugee Status Determination ti asi i UNHCR interview vialte lakah abiapibikmi asi ti zong ti khawh asi. A ruang cu ralzaam sinak (humhimnak) pek le pek lo biakhiahnak interview asi caah asi.

Cun RSD interview cu min khumhnak (registration interview ) an kan tuah lio i kan mah nih kan zaamnak a ruang kan rak chimmi siloah ah catlap tein kan rak pekmi hna kha a si tak maw si tak lo ti kha biahal kherhlainak an kan tuah. Kan khua ram fing le tlang, horkuang tiva le pawngkam thil umtuning vialte tiang in dothlat asi cang. Biadang in chim ahcun ralzaam ka si a tinak a ruang hi lihhrokhrawl asi maw si lo ti khi asi. Cucaah kan chimmi kha zumhawktlak le cohlanawktlak asi hrimhrim a hau. 

1951 Refugee Convention (vawlei cung ram hruaitu le aiawhtu ralzaam kong tonpumhnak) ah ralzaam sullam le hrilhfiahnak (refugee definition) cu fiang tein an rak langhter. Cu hrilfiah ning ahcun mi pkhat cu hremnak le fahnak a ton dingmi tihnak a um taktak mi ruangah a umnak ram chuahtaak in ramdang ah a zaam ahcun ralzaam asi ti asi. Cu hremnak le fahnak a ruang phun tahfung 5 in an then. Cu hna cu:
1. Thawhkehnak miphun sinak ruang (race )
2. Biaknak ruang (religion)3. Rammi sinak ruang (nationality) 4. Ramkhel ruahnak ruangah (political opinion) 5. Riantuannak bu pakhat khat ah chungtel sinak ruangah  (membership in a particular social group)

RSD interview ahcun kan rak zaamnak aruang (case) kha hi phun 5 chung ahhin phun khat tel ah aa tel maw tel lo ti kha Officer (interview tuahtu) nih a zohchih pengmi asi. Cutikah hi phun 5 chung ah pakhat ruang te tal hmanh ah kan si lo ahcun ralzaam sinak (refugee status) hmuh ding a har ngaingai.

2017–18 chung ah UNHCR nih 2013 lio i humhimnak kawlmi (asylum seeker) tiah min rak khummi Chin ralzaam hna cu RSD interview tam lak te an rak kan tuah manh. Interview tuahmi minung a thong chung ah 100 ah 90 (90%) cu kan rak sung dih (card le catlap chuh dih kan tong). Ralzaam kan si kan tinak a ruang (case) kha an rak kan cohlang lo. Khi lio caan i kan ram sining le dirhmun ruang zong ah tampi cu a rak si. Asinain a tam deuh cu kan rak zaamnak aruang (case) le timhtuahnak tha tein kan neih lo ruang zong ah asi.

A tu zong 2013 UN catlap pekmi RSD interview tuah asi rih lomi interview an tuah pah than cang hna caah ralrin le tuaktan cia a herh ngai.

RSD interview ah kan i ruahcia ding le timhtuah cia ding 1. Kan zaam ni le thla 2. Kawlram kan chuahtaak ni le Kawlram chung a donghnak kan umnak khua  3. Thailand kan phanh ni (Kawlram kan chuah taak ni he aa khat kho)4. Thailland ah ni zeizat kan rauh 5. Malaysia kan phanh ni 6. Kan rat ning kan lam thluan (zei indah kan rat ..motor, ke,  tilawng tibantuk7. Fahnak, hremnak, namnehnak, thleidannak kan tonmi le kan  tonnak a ruang/ kan tonak hmun le caan 8. Mi dang nih hremnak, fahnak le tlaihkhih nak an intuar dingmi  kha kei zong nih ka ton ve lai tiah na ruah ahcun zeiruangdah  ka ton venak ding asi timi fiangtein chimrel khawh hau. 9. Aho nihdah cu bantuk temtuarnak cu a kan pek/ pek lai10. Kir ning law zeidah ka ton lai/zeidah ka cung ah a tlung lai/cu ka ton dingmi le a tlung dingmi cu teh zeiruangah 11. Nun him lo tiang in fahnak le hremnak a kan petu ding hi Cozah uktu le nawlngeitu an si lo ahcun zeiruangdah Cozah  nih humhimnak a kan pek duh lo/ pek duh lai lo / pek khawh lo .

Theih ding le i ralrin ding 1. Sifah le rum ruang ah ralzaam sinak pek a um lo 2. Harsat ruang le ei awk din awk neih lo ruangah ralzaam sinak pek a um lo3. Riantuanmi ruangah ralzaam sinak pek a um lo (tahchunnak: Pastor si ruang le Zung riantuan si ruangah ralzaam sinak pek a um lo)4. Ka nupi/ ka pasal/ ka nu ka pa/ ka u ka nau/ nih a ka auh ruangah ka ra tinbantuk chim lo ding5. RSD interview ah ramthumnak kalnak kong hal lo / chim lo ding6. Cawncannak / fimthiamnak neih le neih lo kha zohmi asi lo7. Holh thiam le thiam lo kha biapi si lo8. Malaysia ah zawtfahnak na neihmi/ harsatnak na tonmi/ na him lonak kong cu chim khawh asi

Note: Minung pakhat kan sining le konglam (case) aa dan cio caah interview ah Officer nih bia a kan halmi zong aa dang cio kho caah kan mah le zaamnak a ruang hoih in timhlamhnak neih a tha.Credit-Ceumi Lian

Be the first to comment

Leave a Reply

Your email address will not be published.


*