Malaysia um laimi lungrethei in a um cang.

Malaysia Um Refugee Kan Unau le Thawngpaang. Kawlram a buai liopi le kan harsat liopi a si ko. Nain, Malaysia um kan unau le thawngpaang zong theih lo le hngalh lo in um awk a that lo caah a tawi fiannak in thawng i theih hi a tha ko rua.

Covid-19 ruang ah ni 23 chung lockdown a si cang. Thlatkhat chung lockdown a si lai tiah cozah nih thawng a thanh mi chung ah thutdir lio a si. Thlakhat a tling lai i an pehthan lai hi mipi nih zumh a si. Nain, cozah lei nih cun pehthan ding thawngfiang a thanh rih lo. Laimi cheuhnih ah cheukhat cu harsa ngai le lungrethei ngai in khuasak a si cang.

Lungrethei le harsat lio ah a van i chapthan mi thawng cu malaysia um refugee minung an dihlak in Malaysia cozah nih covid-19 hrik khamsi chunh a si lai tiah thawng theih a si. Malaysia um laimi dihlak ah UN card/catlap a tlaih mi le tlaih lo mi ah a tlaih lomi aa tam deuh. Malay cozah nih UN sin ah na mimung pawl covid-19 sii ka chunh hna lai a ti tik ah UN nih le chunhnak nawl a pek ve. A pek bantuk in sii chunh cu a si lai i UN card/catlap a ngei lo mi pawl caah a him lo kho cang.

Malaysia um laimi lungrethei in a um cang. A ruang cu cozah nih phung ning lo minung cu mah le ram cio ah an duh tik poh ah kuat khawh a si cu mu. Fawi le bau te ah tlaih khawh an si lo hmanh ah riantuan a ngah ti lai lo. Covid-19 sii chunh cangnak catlap lo cun khoika hmun hmanh ah riantuan a ngah ti lo ding dirhmun khi a si cang. UN nih le mithar a lak fawn lo caah malay um UN card/catlap a ngei lo mi caah cun a him lo ngai ding dirhmun khi a si.

UN card/catlap a tlaih mi tiah le a tu covid-19 sii chunh ding an ti mi hna hi Tuluk ser a si hoi. Malay cozah nih US, UK le China sii a cawk i US le UK ser cu amah rammi a chunh hna. Tuluk ser hi a zumh lo ruang ah maw fefugee minung cung ah test a timh hnga ti awk in a um. US le UK ser an mah rammi nih an i chunh mi cu voihnih lo le voithum i chunh ding a si.

Nain, China ser refugee minung chunh ding tu cu voikhat lawng a si hoi lai. Ruahnak thalo ngeih ah cun thah an kan duh ruang ah a si tiah chunh duh lo a fawi te. WHO ( World Healh Organization) nih pei tha tein a check i a tha tiah confirm mi a si ko cu tiah le WHO cu kan theih bantuk in Tuluk kut deuh ah a um mi WHO deuh khi a si. Tuluk cu kan nih kawlram mi ca lebang ah cun zumh an um lo ngai. A bik in kawlram mi refugee minung caah. Cu caah sii chunh ding ah min pek ngam ding zong a har ngaingai.

Malaysia mipi nih a cozah sin ah bawmh a hal rih mi zong refugee kan caah cun lungrawk ngai khi a si ko. Refugee mimung poh hmundang kakhat teah kan chiah piak hna uh tiah an nawl. Refugee mimung poh a dang te ah chiah hei sisehlaw UN card/catlap a ngei lo mi caah a him lo taktak ding khi a si hoi.A tu hmanh ah rian lo le zawtfahlak ah harsa tein a nung mi malaysia kan unau hna an him lo chin lengmang kho. Sii chunh ding tu cu WHO nih a tha tiah a confirm ve ko i card/catlap a ngei mi cu i chunh ta a hauh ko lai. A pingpang a um sual le ramhruai tu le WHO tu hna ta an i ceih te ko lai. Kan biak Pathian tu nih kan huppheng in him tein kan chia hram ko seh.
Credit the green hill post

Be the first to comment

Leave a Reply

Your email address will not be published.


*