Malaysia cu lockdown ( MCO ) an tuah than hoi cang.

Malaysia cu lockdown ( MCO ) an tuah than hoi cang. Malaysia cu nikhat hnu nikhat in covid – 19 mizaw an karh tuk caah May 6-17 tiang lockdown an tuah than cang.

Lockdown an tuahnak hmun hi Malaysia ram pumpi si loin Hulu Langat, Gombat, Prtaling, Klang, Kuala Langat, Sepang hna an si. Mahhi Selangor state an si hna. Selangor state chung poh i a ummi District ah khan tlunkal a nagh lai lo. Sabah lei zong MCO peh thiam a si rih ko.

An mah Malay raya chung a si caah biatak tein an rengh khun. An mah Malay raya zong inn khat ah minung 15 chung hman lo ding, i pumh lo ding ti a si.

Kanmah Chinmi buakinn pumh, inn pumhnak le puai tuah pawl zong a ngah lai lo. Bawlung puai tuah tibantuk pawm le sianginn kai pawl zong a ngah lai lo.
Credit-Malaysia Chinmi Authawng

HRINGTU NULE DAWTNAK (CAPAR) A rauh hlan ah hringtu”Nule Ni” ni sunglawi kan phan ṭhan cang hna lai. Hringtu Nule upat peknak caah “HRINGTU NULE DAWTNAK” capar tawite rak rel cio dingin kan kuat hna.

HRINGTU NULE DAWTNAK”Ka nu dawtnak le thlacamnak atu ka vun ruah ṭhan tikah zei ruat loin ka rak nun ruangah a ngaih ka rak chiatter. Fa ṭhalo ka si buin ka cungah a veel a ngan, a duhnak ralchanh in ka rak um i bia ka rak chim zongah a ka ngaihthiam. Ngaihchiatnak mitthli he ka caah thla a ka campiak zungzal. Sihmanhseh a dawtnak zei ah ka rak rel lo. Ka nu dawtnak atu ka vun ruah ṭhan tikah a ngan hringhran in a thuk in a sunglawi hringhran ko.”

Innchungkhar ah a rethei bikmi hna le ai tuai bikmi hna cu “Hringtu Nule” hi nan si ko. Nifatin tein nan pasalle zitmuai leiah siseh, fale zohkhenh kongkau ah siseh, innchungkhar kongkau ah siseh, thil dangdang kongkau a herhmi vialte ah siseh nule hna hi a cawlcang bikmi le a rethei bikmi cu nan si.

Dawr kal chukcho, chumhchuan, thilsuk, inn thianhhlimh le fale kholhṭawl vialte pakhat te hmanh bau lo tein hringtu nule nih nan tuah dih. Cu lakah nule nih nan chumhchuan ciami cu fale nih ei duh lo i kan um tikah lung ṭha loin a ummi cu hringtu nule nan si fawn.

Fanule hna an tlonlen umkal tik le an thil hrukaih kongkau ah le fapale hna an tlonlen tikah hawikom ṭha lo he hna i kom in an nunning hna i rawk in thil sual hna tuah sual hna lai kaw tiah lungrethei in a um i fale ṭhat nakding caah thlaza a cam pengmi hna cu nule hi nan si. Fanule hna an thla a hung corh(An cutcat) tikah hawikomh thiam lo ruang le thil pakhatkhat ruangah maw an min hna chia sual lai kaw tiah a thli tein a thin ai domh i fanule caah lungrethei in a um pengmi le thlaza a cam pengmi zong hringtu nule ṭhiamṭhiam hi nan si.

Nule nih fale cungah nan ngeihmi dawtnak thinlung hi zei he hmanh tahchunh awk a ṭha lomi a si. Fanule hna le fapale hna chimpit vansang in kan sual ko bu zongah a kan ngaithiamtu cu hringtu nule hi nan si i, lung ṭha loin a um i fale caah thla za a cam pengmi zong nule hi nan si ṭhiamṭhiam ko. Nan fale nih Nule nan cungah zeitlukin lungretheihnak le hnahnawh buaibainak kan in pek caan hna le fale ruangah zeitluk i ngaihchiatnak nan ton hmanh zongah huatnak mit a au bal lomi cu Nule hi nan si.

“Ka nu…,ka hngakchiat lio i na rak ka awih tawn i hla na rak ka sakpiak lio caan te kha… Zaan na ka thlim tawn i na hlasak thawng te kha atu ka hnathlam ah an cuang peng ko e. Ka nu, na fa kei kai hngilh hlan ah hla ka sakpiak ṭhan ko rih law, ka nu, ka awi rih law hla ka sakpiak ṭhan rih law…, ka nu, zaan ka ih fa te na hlasak aw thawng te kha ka hnathlam ah an cuang peng ko ee ka nu. Ka nu, na hla aw te nih a ka thlim tawn i dai tein kai hngilh tawn. Ka nu, na ṭaang lum te cung i na rak ka beh i, na rak ka awih tawn i hla na rak ka sakpiak tawn kha mu… Hi vawlei cungah hin a ngaih nuam bikmi cu ka nu, nang na hla aw te kha a si ko ee ka nu…,”

Vancung i a ummi Thlapa i a ceunak cu a dulh zong a dul kho ko lai, nain hringtu nule nan dawtnak cu a dul in a ziam kho lo. A luang lengmangmi tiva hmanh khi a reu caan a um tawn, sihmanhsehlaw nule hna nan dawtnak cu a reu kho lo. Aa thleng lengmangmi khuacaan hoih in a par lengmangmi pangpar hna khi an uai ṭhan tawn, nain hringtu nule nan dawtnak cu zeitikhmanh ah a uai bal lo. Hringtu nule nih nan ngeihmi dawtnak cu fale caah a zungzal in a hninghno peng.

Ni le thla an liam lengmang bangin kum le caan zong nih an liam lengmang ve. Hi bantukin ai thleng lengmangmi vawlei khuacaan hna bangin ka Nu, nang na dawtnak cu fale kan caah liam in thlen caan a um lo. Taksa, thinlung le Thlarau in a khatmi minung nang le kei cu chim lo zeihmanh a hngal lomi saram hmanh nih an fale cungah hringtu nu an sinak nule dawtnak kha an ngeih. Zeitlukin dah hringtu nule dawtnak hi a ngan i a sunlawi ti kha ruat ko. Hringtu nule dawtnak hi cham khawh dingah cun a fawi lo, asinain nang le kei nih nu le pa dawtnak kan cham khawh bikmi cu an lunglawmhter i an ngeihchiatter lo i, caan tawite an nun chungah an lungthin nuamte in an um khawh nakhnga i zuam usih. Cucu nang le kei nih nu le pa dawtnak kan cham khawh bikmi cu a si ko.

Minung kan nunnak hi caan tawite lawng a si ko. Hringtu nu le pa an nun lio ah nu le pa dawtnak a cham khomi si i zuam cio hna u sih. Nu le Pa dawtnak a cham khomi fale kan si khawh nakhnga thla za kan campiak hna.

Vawlei kil li ah a ummi hringtu nule si hna u, kan ram ah a ummi hringtu nule si hna u, hringtu nule vialte nan dihlak hi capar in upatnak kan pek hna. Hringtu Nule vialte Bawipa nih ngandamnak le nun khuasaunak thluachuah in pe ko hna seh.Vawlei parpahlik in, Salai K. Biak Lian Thawng Hamar, Norway

Be the first to comment

Leave a Reply

Your email address will not be published.


*