Malaysia ahcun nungak tlangval ai duh mi i daw cikcek uh

Malaysia cu cikhat te kan umnak a si. Ralzam dirhmun in kan umnak a si. Kan thih hlan lo um zungzalnak ding ah ka i tinhnak ram a si le hmun a si lo.

Cikhat te a kumkum in kan lennak Malaysia ahhin nungak tlangval ai duh mi nan um ahcun i daw cikcek. Tar le far dawt bantuk tein i daw uh. Ho hmanh thinlung i fah ter hlah ulaw ho hmanh lungretheihnak le mithli tlaknak i pe hlah uh.

A ruang cu Malaysia ahhin phungning loin a ummi kan si dih caah ho hmanh ai nuammi kan um lo. Cikhat te park in kan len caan te ah khin kan i nuam i kan tlun lei ahcun tlaihkhih kan tong sual hnga maw? Misual damiah he kan i tong sual hnga maw tiah thinphang le lungrethei in kan um thiamthiam.

Zeitik dah kan inn ah misual damiah an rak luh lai i kan thil ri an ka chuh lai. Kan phaisa an kan chuh lai. Zeitik dah operasi nih an kan luh hnawh lai an kan tlaih lai tiin inn chung kan um hmanh ah hna a ngam kho taktak bal lo. Rian kan tuannak zong operasi an lut sual lai maw kan ti, kan kal kan tlun pah ah palik nih an kan tlai sual lai maw kan ti, damiah he kan i tong sual lai maw kan ti i thinphang dai loin kan um zungzal.

Cu tluk in a harmi ram ah kan um. Kan dirhmun hi zangfak kan si. Cu bantuk kan dirhmun a si lio ahhin nungak tlangval i duh mi hna cu i daw cikcek uh. Tar le far bantuk tein i daw ulaw i daw le rem tein um i zuam zungzal uh.

Malaysia cu nan theih cio bang ruah lopin tlaihkhih a tong kho kan si i thong ah a tla kho kan si. Sizung zong ah a phan kho kan si. Nulepa um lonak ram ah khua a sami kan si caah na darling nih khan nangmah dah kaw an bochan cu. Na darling nih zeibantuk harnak a ton hmanh ah “ka darling” a um ko tiin an bochan khawh mi si kha i zuam zungzal.

Malaysia cu ngaihchiatnak le lungretheihnak kan ton tik ahhin mah lawng in tuar a si. Tuar a har khun. Nan harsatnak ah i bawmchan ulaw i tanpi uk. Tlangval nih zan khat hnih ca men ah “kan duh” timi nu sinah biachim i sum. Malaysia ah nuhmei dirhmun hi zeitluk in dah a har timi theih piak.

Na darling nih khan zeibantuk thil a ton poh ah nangmah an hlam. A lungretheih caan ah thazang petu si law a tlamtlin lo caan ah bawmtu si. A ngaihchiat can hnemtu le mitthli hnawt tu si law harnak a ton can ah bawmtu tha bik si i zuam.

Na darling kha ruah lo pin suzung a phak sual si zong ah nangmah nih zohkhenh. Tlaihkhih a ton sual zong ah nangmah nih tuanvo lak i zuam.

Vawlei cung khoika ram le hmun poh ah nungak tlangval ai duh mi cu i dawt dih ding a si ko. Sinain Malaysia cu phungning loin kan umnak le har tuk in kan umnak a si caah nungak tlngval ai duh mi cu i daw cikcek uh. A cung lei ka tialmi vialte khi tuah piak khawh i zuam uh. Na lungtlin ahcun rak share ve.Malaysia Chinmi Authawng

Be the first to comment

Leave a Reply

Your email address will not be published.


*