Major Salai That Ci bia roling

Major Salai  That Ci bia roling 1988 June thla 18 or 19 dek chun hrawng ah ruahlo pi in inka in Salai That Ci cu a rak lut. Aw ziah ruahlo pi in zeitik dah na phak tiah ka hal.Tu zing ka rak phan ati. Khoika ah dah nai tthumh tiah ka hal I kai tthum rihloh. Tlanglawng station in a tu hi nan sin ah karak ra ati. Aw sitak hika ah hin rak itthum ko ka ti I, a poilo, siangin pawng hrawng ah hawi sin ah ka riak te lai ati.

Ziah hitluk ram buai lio ah ruahlo pi in zeirian herh ah dah na rak rat tiah ka hal.Law in degree a la I Kalaymyo ah Lawyer (sihni) ttuan ding in kumkhat rian cawn in a um kha ka theih caah ka hal mi asi.Zei rian herh hmanh ka nei lo. Kalaymyo ah Lawyer ttuan ding in kumkhat training ka tuah lio asi. Ni chiar court ah ka kal, kai nuam ngai ko. Asina in Rangoon I sianghngakchia cawlcanghnak thawngpang zanchiar radio ka ngai I ka um kho bak lo. Rangoon I rak rat I rak itel ve bak ka duh caah karak choi ko,ati. Tuchun zei cawlcangh nak le lam zawh a um hnga maw tiah a kan hal I, kan thei ve bak lo e. Hledan hrawng ah kan va kal tuah lai cu kan ti. Zal kai bei I Salai That Ci he cun kan chuak.

Kan chuah pah ah ka upa nih hitluk har le fe in siangin an kan kaiter mi ruatlo in tiah a vun ka cak. Pa Ci he cun kan chuak I kan izoh I kan ni. Kan kal pah ah Hledan lakphak dawr kan rak tthut tawn nak Aung Thoo (ti asi rua ka ti) timi dawr ah kan thu. Lakphak kan ding I mi cawlcangh cu kan hngak. Cu lakphak kan din pah I a chim mi cu ka hnathlam ah a cuang zungzal.

Atu bantuk kan mah chan hna I hiti bantuk Socialist cozah dohnak biatak te I a chuah hi kan van a ttha tuk. Uknak tthalo hi kan pa le pawl le kan u le pawl nih doh an rak duh tuk ko na in an chan he a rak itong thiamlo. Dothlennak timi hi chan he ai ton lo ah cun tel duh len zong ah itel khawh asi lo ati.Cu ni ah cun Hledan in Menikung lei tiang kan kal, dohau nak ah  palik nih meithal in an kan kah. Sianghngakchia zong zeimaw zah an thi I palik zong zei mawzah an thi. Rangoon ah zarh thum chung hrawng kan izul I dohau nak ah cun kan itel.

Ahnu ah CNA ah kan lut tti. Champhai in BDF timi ah kan rak um lio hrim ah CNF ah luh I hriamtlaih ding kha kan rak itim.Kachin ram I KIA sin kan um ah kan battalion ai khat na in kan company aidan caah training kan dih hnu kan I hmu thai tilo. A hnu bik ah Wireless chonhnak in kan ichawn I kan aw a cat pah lengmang I kan bia a fiang kho lo.Ahnu ah ral nih Uk Lian Thang he an tlaih hna ti thawng kan theih. Cu hnu ah ral kut in an pam ti thawng kan theih. An mah pahnih kong ka ruah ah ka lung a dai ballo. Cucaah cun asi theu lai. Ka mang ah fiangtuk in ka hmuh lengmang ttheu.

Rangoon Sianghleirun ka phak ah anih cu Law final year arak si cang. Keimah bantuk a rakphan thar mi kha Sianghleirun I cawlcangh, tthutdirr ning, an mah hna an u le pawl deuh kong, kan pa le pawl deuh kong tampi a kan chimh ttheu.Lawyer ttuan a rak duh ngai mi asi. Sianghleirun ah saungai kum 7 hrawng a rak tlongleng mi asi. Aduh tuk mi Lawyer ttuan ding ah a thla lawng  a ba cang na in dothlennak lam tu ai thim. Dothlennak lungput anei mi le a chim lawng chim lo in hmaisuang in tel a duh mi le a ngamh mi asi.

CNA ah kan lut lai I Kachin ram ah training kai ah kan kal lai ti kan rak iceih zan ah Champhai pawng ah a chim mi bia cu; Atu bantuk dothlennak chan ah kan chuah mi hi kan van a ttha tuk. Cun ka nu hla cuang pei asi cu;

Khuaza kan Lairam kulh chung, ram zung ceunak zuam u leng le val rual hnaZo Cinrung khua ri luaimai, rawk lo ni bang tlang seh, Ho maw lungkam lo chuncha bang dir ve lang Salai That Ci I anu cu Pi Far Hniang asi. Pi Far Hniang cu “KAN RAM CEUVE CANGSEH (Chan kar lak ah) ” timi thingpar sang aw I a phuah tu asi.Major Salai That Ci lungdonh cu 2018 December thla ah khan ka va veh. Lung a leng.Credit-Salai Bawi Lian Mang

Be the first to comment

Leave a Reply

Your email address will not be published.


*