Lungkhur chung in ruahmi

Ralhrang ruang ah mual a liammi kan karh ziahmah. An tam chin lengmang. Lung a fak khun mi cu ruak hmanh kan i humh khawh lomi hi asi. Ar thih le vok thih hmanh kan tluk ti lo ti nak asi.

Capo biatak in an chim tawnmi ka theih tawn mi cu ” laimi cu thih hnu ah aa sunhsak mi miphun kan si” timi hi asi. Kan nun lio ah kan i sunhsak lo ti duhnak si loin thih tikah tha te’in ruak aa fimhlawm mi miphun kan si, timi hi mah biafang nih a langhter duh deuh mi asi. Laimi cu chiat kan ton ah, innpa chakthlang in siseh, veng le sang, khuakip, hmunkip in kan i chuah hnawh i ngaihchiatnak aa hrawmmi miphun kan si timi hi mah biafang nih a langhter duh deuh mi asi. 

Tutan kan rambuainak ruangah mual a kan liam tak mi Hakha kan unau le pahnih (pu Tler Ling le Khamh Bawi) kong ruah ah lung a fak khun. Ruak hmanh an kan pe duh lo i an kan vaivawnh piak mi hi cu ruahthiam khawh asi hrimhrim lo. Philh a um lai lo.

Kan ”Chin Act” ah ”mipakhat an kan thah ahcun mipakhat thah ve” phuhlamnak hi asi. Kan bible a bik in thawngtha cauk nih a kan cawnpiak mi he cun aa kalh men lai nain a tu kan kawlram thilsining he cuaithlai tik ah lung a hmui kho hrimhrim lo.

Kan ramri an duh paoh in an kan en. Kan thilri an duh paoh in an kan sawksam piak. Kan nupi, kan far le an duh ning paoh in an kan tlaih hrempiak. Cupin ah an kan thah. Kan ruak hmanh an ka pe duh lo.
Lungthin a fak hrinhran.

Media chan asi kan ti. Media hmang in kan ngaihchiatnak kan langhter. A dik. Nain kan lai ralkap rian lawngah kan chiah.  Kan i bochantuk hna ruang ah asi lai dah. Nain luartuk in kan ti hna tik ah kan i bochannak hna langhter lo in an thang kan chiat hna ah a cang diam tawn.Kan biachim mi le ka catial mi hi ”biatung maw si, biaphei” timi kan tuak tan deuh a herh.
Kan lai ralkap rian lawng asi lo. Ka rian asi ve timi zong hi kan theih a hau.

Tutan kan tonmi thil nih laimi hmunkhat ah a kan namnehtu sahrang doh dalnak ah a kan funtom tu ah zingnu nih thlua kan chuah piak hramseh.By Chavy Tha Tin Kulh 12 April 2021

Be the first to comment

Leave a Reply

Your email address will not be published.


*