Lungawttawm in um hlah!

Deikate hrawngah khin Jesuh cu lawng cungah a chiahtami hna a zultu leiah cun a ke in ti cung cun a ra. “Mithla a si,” tiah a zultu nih cun an ruah caah lau ngai in khin an ai. Jesus nih, “Nan thinphang hlah u. Keimah pei ka si ko cu. Hnangam in um ko u,” tiah a ti hna. Hi cacang te nih minung kan sining kong a fianter khawh ngaimi cu “Ttihnak cu minung fa a simi paoh nih ngeihmi a si.

KHRIH he lawng pakhat a cittti mi sining caan lio zong ah lau le, ralchiat le, ttihphannak cu a rak tlau dih hrimhrim lo timi hmuhsak hmanthlak pakhat a si ve.” Cucaah ttihnak lungthin a ngeih rihmi na si ahcun va i lawm ko, zeicahtiah a nungmi na si rih! Cun cu ttihnak lonhnak ding caah caan tha na ngei lai tinak zong a si.
Cun Peter nih khan, “BAWIPA, nangmah na si taktak ahcun, na sinah ka ke in ti cungin ka ratter tuah,” tiin a hun chawnh. Jesuh nih cun, “Ra ngat,” tiah a ti.

Liklak tiin Peter cu lawng cun a vung ttum i ti cungah cun a ke in Jesuh leiah cun a kal. Sihmanhsehlaw a kiangkap ah a cangmi thlitu fahnak kha a hmuh tikah a thin a phang than i ti chungah cun pil a tim ruang mang i, “BAWIPA, ka khamh tuah,” tiah a au. Hi Peter nuntonak hi kan mah cio caah nun chimtu tha a si ve. Zultu dang bantukin hnatheihnak tehte “Peter, ra hngat!” timi le “Keimah, nan Bawipa, Jesuh pei ka si ko cu ti cung i a kalmi cu” tiin mithmuh tehte sining lawnglawng hi kan zumhnak ah a za hrimhrim lo. Peter bantukin zumhnak he kekar a herh! Kan zumhnak cu a hmemi karhlannak in kan thawk a biapi.

Zeicahtiah KHRIH nih nan zumhnak a der, a hmet tibantuk ruangah kan khamh hna lai lo a ti hrimhrim lo. Zumhnak he kan aunak aw a theitu cu BAWIPA a si. “Ka harnak chungin maw BAWIPA kan auh i na ka leh; Sheol paw chungin bawmhnak hal awkah ka au i ka aunak cu na ka theihpiak,” tiin Jonah zong nih tehte a rak khan (Jonah 2:2). Cu Cathiang nih a langhtermi cu, kan aunak aw theinak ding caah kan Pathian cu zungzal in kan pawng ah a um ko timi hi a si.
Cun Jesuh le Peter cu lawng chungah cun an lut i thlitu kha a dai. Lawng chung i a ummi a zultu hna nih khan Jesuh cu an biak.

Nihin Dohthlennak tilawng cungah minung a phunphun kan um hna. Kan i khah cionak tu cu kan zumhnak lungput, cucu hi hramhram uknak cu din lonak theipar a si caah kan doh lai i Pathian hnatlakpinak thawngin kan tei lai tiin rianulh, sining thap le nunpeknak in ni 80 reng lo kar kan hlangti hna. Minung kan si cio hna bantukin a bami, a dermi, a thinphangmi, le a lung dong hnikmi ti bantukin um khawh a si taktak ko.

Sihmanhsehlaw kan philh cio lo dingtu cu nihin ah hi ralkap thalo uknak kan tei lo ahcun kumpi 30 maw, 70 maw, kan techin fapar hna nih an rak tuarin dingmi sining kha kan mitthlam in kan cuanter a herh cio ko lai. Zeicahtiah ning cang loin uknak firtu an si caah ralkap le a riantuan piaktu hna nih cun a ra laimi caan ah an tuanchuah dingmi theipar cu lih le hrokhrol, fir le tlei, tuk le thahnak hna kha a phi chuak ding ah hmuhchung khawhmi cu an va si ko.

Cucaah nihin kan Dohthlennak cu a hmanmi biachahnak le dawtnak in minphun caah nunpek a si ko caah BAWIPA nih a cohlanmi a nung raithawinak a si ti hi philh hna hlah u si. Zumhnak hmete a si zong ah BAWIPA nih lungawttawm in um hlah! Ka sin ah ra ko, tiin nawlpekmi kan si. Kan Pathian cu a biakam a let bellomi BAWIPA a si.

“BAWIPA cu a dawtnak kha a fek i mi tlanh kha a duh zungzalmi a si caah, Maw Israel, amah cu i bochan ko.” (Salm 130:7)@siapiraldo စစ်အာဏရှင်စနစ်ကျဆုံးပါစေ WeSupportNUG CDMSupport JusticeForMyanmar Whatishappeningin Hakha icaregenz

Be the first to comment

Leave a Reply

Your email address will not be published.


*