Lung a fak ko.Nain,An kan tei lonak:

Ralkap le palik kut in minung 160 hrawng an thi cang an ti. Cu hmanh cu nizan tiang lawng a si rua i, nihin zong an thi len rih rua. Cu hmanh cu theih khawh lomi le hngalh khawh lomi um rih dawh a si an ti rih. Ruah ah lung a fak ko. Tuah khawhmi zei kan ngei áš­ung lo i, lungfah lawng a si ti lo. Thin zong a hung ngai. A celh celh khi a si lo.

An kan teinak:Ralkap an ngei. Palik an ngei. Meithal an ngei. Cucaah duh paoh in mi an thah. An tlaih hna, an hro hna. An hrem hna. An fir. An thleh, an bauh. Anmah nawl a si. An lal. An mawh lo ti ko hna usih. Meithal cu pei an ngeih fam cu!

An kan tei lonak:Ralkap le palik an i ngeih i, meithal zong an ngeih ko nain, an ngeih lomi a um len ve. A pakhatnak ah mipi lungput pakhat hmanh an ngei lo a si ko. Hihi a kan teimi an lo ko nain, an kan tei lonak ngan bik a si ko. Cu lawng hmanh a si lo. CRPH kan ngei. Caan karlak President kan ngei. Dr. SaSa kan ngei. U Htin Lin Aung kan ngei. U Kyaw Moe Thun kan ngei. Kachin ralkap kan ngei. Karen ralkap kan ngei. Shan ralkap kan ngei. A dang zong an ra len rih lai dah.

Kan tei hna nak:An kan tei lo lawng a si lo. A tei bakin kan tei ko hna. Zeicatiah, vawleicung khuazei ram hmanh nih khi hna pawl khi an pom kho rih lo. UN le US le a dangdang cu chim lo, Asian hmanh an pom rih lo. UN le nitlaklei ram lebang nihcun U Win Myint kha President ah an pom ko rih. Aung San Suu Kyi an pom ko rih. November ni 8 thimnak kha an pom ko rih. CRPH an pom ko. Caan karlak President pa zong an pom ko.

Har cu a har bak. Lung cu a fak bak. Thin cu a hung bak ko. Re zong a thei bak ko lai. A pam zong an pam taktak cang. Asinain, ruahchannak a um ko. Ni nikhat cu kan phan te lai dah. Retheih vansan a tuarmi vialte Bawipa nih in umpi cio ko hna seh.Credit-Pelhkalh Thawng

Be the first to comment

Leave a Reply

Your email address will not be published.


*