Loklung khua inn 180, khuami 850 fai cu khuapi le khuate hmun 12 ah an zaam

TCP Hakha| 2021 May 24 — Hakha in meng 10 tluk lawng a hlatnak khua Loklung khua i May 18-19 ah CDF le Kawl Ralkap an i kahnak ruang ah khuami an zapi nawn in an zam i Hakha, Vanmualthar (Lichia), Zathal, Buanlung, Phaipha tbk. ah dornak an kawl. Cun, Mizoram tiang a phan mi zong an um tiah theih a si.

Loklung khua in a zaam mi a dang tampi chung in Dongva khua ah dor ding in a phan mi hi 190 fai an si cang tiah theih a si. Nain, lamnaih khua ah chawhleh le thialkam pah a si caah, a milu zat hi fiang in chimh khawh a si lo.

Loklung in a zaam mi hna hi khuapi in khuate kip tiang an zaam lawng silo in, a cheu cu Mizoram tiang an phan. A tanglei ah The Chinland Post nih pehtlaihnak tuah khawh mi chung in kan hun langhter;

Buanlung: Inn 85, minung – 365 Dongva: Inn 18, minung 115 Zathal: inn 20, minung 89 Vanmualthar (Lichia): 23 – minung 111 Phaipha – Inn 2, minung – 9 Mizoram – Inn 8, minung 39 Hakha – Inn 2, minung 21 Tlangrua – Inn 1, minung 8 Kukchah- Inn 3, minung 4 Lungrang – Inn 1, minung 4 Lungkhing – Inn 1, minung 6 Matupi – inn 1 – minung -6

Hakha in Dongva khua eidin bawmhchanh ding tawlreltu nih, “Dongva khua lawng ah 190 in 200 tluk an si cang. An karh chin lengmang. A dangdang khua, Vanmualthar (Lichia), Zathal, Buanlung le Hakha lei ah an i dor cio hna. Khua mi nih him nakding caah lam hlat chinchin ah phanh an duh. Hakha ah a rak phan cang mi zong, Khuate lei ah a thial than mi an um len” tiah a chim.

Dongva khua caah, facang telh in eidin tbk. zong kan tawlrel, cawk cia zong a si cang nain, kan pe kho hna lo. Facang le ei din phorh cu an duh lo caah Khuate lei a ummi sin ah kan phanh ter kho lo tiah a chim.

Loklung khua mi an zaam dih hnu ah, May 20 ni CDF nih cathanh an chuah mi ah tanglei bantuk in an langhter, “CDF-Hakha le Ralhrang Kawl Ralkap minung (70) tluk cu Hakha-Gangaw lam in Loklung lei pialnak ah an rak kan tum hnawh caah May 18 zanlei 4pm tluk in May 19 deilei 6am tluk tiang Loklung khuachak ah kan ikap. Cu kahnak cu khuami, Mino bu le Khua nupa hna sin theihter hmasa lo in tuahmi a si lengah Khuami dihlak thinphang thlalau tuk in a himnak lei nan tlik nan zam mi cungah nan kan ngaithiam I na kan theihthiamnak lai kan in nawl hna”.

Loklung khua hi inn 180 tluk a um i, milurel in 850 an si. Hmanthlak: Loklung khua mi an zaam nak pakhat a si mi, Dongva khua a si. Hmanthlak hi Dong Va timi FB ah kan lak mi a si. ~ Editor The Chinland Post

Be the first to comment

Leave a Reply

Your email address will not be published.


*