Lili bantuk he caan hman ti deuh hna usih

Lili timi nute hi middle school a rak kai lio ah sianginn kaiti sianghngakchia hna nih chuncaw ei caan tibantuk ah a kiang ah an thu duh lo.  An hnulei an chit tak. An rak hrial.  A nih hi mi bangin a ngandamnak a thami a rak si lo caah a muihmai zong mi bantukin zoh dawh a si lo. Apert timi zawtnak a rak ngeimi asi.

Elementary School a rak kai lio ah cun a nuam, sianginn kai zong a huam ngai. Nain Middle school a phanh ahcun pakhat le pakhat ipeunak a tam, a phuphu iser i hawikomnak a tam. Mah ahcun a mah te lawng chuncaw einak ah a thu tawn, sianghngakchia hawidang nih an kom duh lo. An chon duh lo. Cu tikah sianginn kai zong a tha tho ve ti lo, a mark zong a zor.  Hawile kom duhsaling hngakchia ve lo bang inn tu in  sianginn kainak tuah piakding a nu le pa cu a hoh hna.  Lungleng le thachia in caan a hman a tam.

Lili zong ahnu ahcun a thi. A nu le pa an ngaih a chia kho tuk. A mah philh lonak caah tiin thil pakhat an tuahmi a um.  Cucu Beyond Differences timi NGO asi. Hi nih hin  hawikom a ngei lomi pakhat khat kha chuncaw ei sawm ding siloah chuncaw einak ah thutpi dingin sawm ding ,idinh caan ti bantukah lengtecelh sawm ding timi biatak tein a dirpi. Hawikom a ngei lomi sinah caan pekding thazaang a pek.

Mah an NGO nih thil tampi a thlen.Zumtu a ti mi zong si hna seh, a fimthiam a ti mi zong si hna seh, a rum a ti mi zong si hna seh, Pathian rian a tuan a ti mi zong si hna seh— Lili bantuk minung sinah caan pek hi kan i harh sual tawn maw?  Mirum, degree sang,  hmunhma ngei le milar lawng kan kiangkam ah thutter le caan hman ti lawng kan duh peng i , Lili bantuk minung hna kan hnulei kan chit tak ahcun mi ngaihchiahtertu kan si lai.

Cucaah kan sianginn ah maw, kan biakinn ah maw, kan innpa/kiangkam ah maw… Lili bantuk minung an um ahcun caan hman ti deuh hna usih. Kan thluachuah kan hmuhmi hna hi Lili bantuk minung sinah cheu deuh hna usih law kan vawlei le kan kiangkam hi a nuam deuh hrim ko lai.Credit-Salai Z T Lian

Be the first to comment

Leave a Reply

Your email address will not be published.


*