Lawmhnak Tling Timi Cu

A lenglei langmi hmuhtheihnak lawng in biakhiahnak le nunning kan I thim tik ah palhnak tampi a chuak theu tawn. Thil pakhat kha a chunglei umtu ning le sining cang hngalh lo buin, a lenglei a hawng hmuhnak lawng in kan cohlan tik ah cun caan a roh hnu cun kan ruahnak a khel tawn in, kan zumhnak zawng lungawtawm in a kan chiah. Kan zumhnak a awtawm tik ah cun kan nunning zawng phundang piin a kal tawn.

Minthang tampi nih an chim bia cu “Teinak kan hmuh tik ah nan kan lawmh I nan kan uar taktak tawn sinain hi dirhmun phaknak ding ah zeitluk in dah harnak le sungzatlaknak kan ton tihi kan theih piak uh” tiah an ti tawn. A chunglei thil fiantaktak chih ah cun a lenglei lawmhnak hi a takin a tling hnga.Fianduhmi cu December Khamhtu chuahthla hi a lenglang menmen lawng in kan hmuh I kan I lawmh sawhsawh sual lai ti hi asi.

Kan caah pek asimi nau te hi kan caah asi taktak nak ding ah hin laksawng le thilthuam dawhdawh le rawl thawthaw he kan don le lawmh ding lawng ah kan ruah tawn sinain a chunglei ah a ummi cu kan mah sualnak ruang ah soiselnak, cilchak, tukvelh, ningzah thleih, mualpho, zolangh, hlawtmi le saram bang an tuahto nak kha kan fian chihtaktak a hau. Cucu Crhistamas lawmhnak tling le donning tling cu asi deuh hnga.

Thilthuam dawhdawh hna hi a lenglei cun an I dawhtuk ko nain a chunglei ah cun thitnak hma pe he a khat tihi kan philh lo a hau. Thleh le zam le thimsawh than asi hnu ah a dawhmi dirhmun ah tharchuah asi.

Nau te hi thleh le zam le sawh asi nak nih nang lei ke cu nunnak thar dawh a kan chuahter.Sining dihlak theihfian le cohlan tik ah daihnak taktak, lawmhnak taktak, hnangamnak taktak a tling tawn.Credit-Ronald Charles Nunuk

Be the first to comment

Leave a Reply

Your email address will not be published.


*