Laimi nih US thimnak kong kan chimceihmi ka zoh tikah nauhrawh nak nawl abortion,ngeihkhat t’hitumhnak nawl same sex marriage le immigration refugees kong an si bik rua dah ka ti.

Nauhrawhnak nawl le ngeihkhat t’hitumhnak nawl kong hi atulio US politics ah buaipimi thil (issues) an si lo. President Trump nih Supreme Court ah conservative Justices pathum toden a pek khawh cang hna caah nauhrawhnak nawl kong ti bantuk kha Supreme Court ah a phanh t’han sual ahcun phundang pi in thil aa thleng kho men mi asi nain tutan thimnak phichuak nih thil sining a thlen ngai dingmi thil a si lo caah buaipi mi issue asi lo.

Ngeihkhat t’hitumhnak nawl hrimhrim cu 2015 lio ah Supreme Court nih US Constitution (Amendment 14) nih a onhmi asi tiah an ti cang hnu cun current political issue a si lo tuk cangmi a si. President Trump nih siseh Biden nih siseh President an tlin ahcun thlenremh an timhmi policies hrimhrim ah aa tel lo. Hmailei caan ah a cunglei issues pahnih hi US politics ah buaipi t’hanmi an si lai lo tiah chimchung awk a t’ha lo nain tutan election kong chimceihnak ah telh lengmang cu meeting agendas ah aa tel lomi pi va chimrel peng bantuk an si.

Ka siarem lo chinchin mi cu hi issue pahnih kong kan chim tikah cozah nih public policies sernak ah biapi bikin a chiah a herh tawnmi rammi minung tambik caah t’hathnemnak a chuahpi dingmi a si maw, timi khuacuanh dan kha telhchih duh loin Khrihfa zumhnak he aa kalhmi thil asi ti bantuk lawng bakin kan chim ngaimi hi asi (zuu le kuak zuar ti bantuk pawl zong khi kokek in thiltha an si lo i kan zumhnak he aa kalh tukmi an si ve ko nain cozah nih an onhnak a ruang a um).

Immigration (refugees) kong tu hi a linsa ngaimi asi hlei ah candidates pahnih nih an dirhmun aa dan taktaknak zawn asi i kanmah Laimi sining he zong fakpi in aa pehtlaimi asi caah thuk deuh in ceihhmai ah sullam a ngei ngai kho men. Congress nih hnatlakpinak tel loin President nih anmah nawlngeihnak bak lawngin tampi an tuah khawhmi thil zong asi.

Immigration policies ah a tlangpi in an idannak pathum cu 1) Biden nih US ah phungning lo khuasa 11 millions hrawng hi phungning in duhsah tein US rammi an si khawhnak caah lamser a duh i Trump nih a duh lo (Congress nih upadi an serpi a hau ding asi) 2) Biden nih US ah hmaikum chungah refugees 125000 hrawng lak a duh lio ah Trump nih 15000 lawng a duh, 2) Trump nih US citizens le legal resident nih ramdang ah a ummi an nupi pasal le kumtling lo fale laknak nawl a khammi hi Biden nihcun on a duh.Credit-Biak Hnin Sang

Be the first to comment

Leave a Reply

Your email address will not be published.


*