Laimi caah fimcawnnak san a tlai lo i kan upat fawn lo Pathian zei kan rello he a khat

Vawlei cung ram le minung vialte lakah 100/95 tluk nih fimcawnnak (education) cu an duh bik i tha an pek dih. An chawva le an caan le an thluak vialte an pek dih/an pek siang fawn. Fimcawnnak cu an upat i fimcawnnak in theihmi le hngalhmi le chimmi zong an ngaih/an zulh fawn. Asinan a poi taktakmi cu Laimi a tamdeuh cu fimcawnnak kan upat lo, zei ah kan rel lo. Fimcawnnak i chawva hman zong kan duh lo. Mah ruangah vawlei cung ram vialte lakah a sifak ram ah a telmi Kawlram chungah sifak bik miphun kan si i santlai lobik le tlangcung kan miphun hawi zong nih zeiah rel lobik mi miphun ah kan i chuah. Din lonak, eihmuarnak le ziknawhnak a tuahbikmi miphun kan si fawn. Mahte hna zonghi tuak tikah Pathian zei i kan rel lo bantuk he a khat. Aruang cu Wisdom Literature kan cawng tikah fimcawnnak le Bible chung fimnak timi khi a pehtlai. A poi taktakmi cu Laimi cu fimcawnnak a neimi biachimmi nak in tang 4/5 awnglo pawl bia kan ngaih duhdeuh mi le kan i upat deuhmi hna asi. Laimi caah cun tang 4/5 awnglo pawl theihmi le hngalhmi khi a fim deuh le a ttha deuh le a tling deuh le a theih deuh in kan ruahmi hi kan hruhnak pakhat a langhnak a si. Tang 4/5 awnglo kha kan caah cun ca zong a rel deuhmi le a fim deuh in kan ruahmi hna hi thangcho nak a kan dawntu bik pakhat zong a si fawn. Mah bantuk pawl bia na ngaih peng ahcun mitcaw le mitcaw lam an i hruai i horkuang le lungpang i an tlak bantuk khi nan lo ko lai.

Laimi caah cun fimcawnnak (education) san a tlai lo. Cucaah cun nan fa le zong kha sianginn kaiter duh hna hlah u. Phaisa lam a pam hmaimen. Miphun dang mifim mithiam pawl bawmhnak hi bawh i hngah peng ding a si ko cu. Fimcawnnak a domi le zei i a rel lomi cu Pathian zei i na rello bantuk a si. Wisdom Literature timi (fimnak cauk) chungah a tel dih ko. Job cauk, Phungthlukbia, Salm cauk tal khi va relte. A dang cauk pa 2 cu na rel huam lo hmanh ah. Fimcawnnak zei i a rel lomi cu mihrut ti an si Khrihfa ttha zong an si kho bal lo i fapa tlau bantuk men an si ko i thangcho nak zong an ta a si bel lo. Mihrut hmanh dai tein a um ahcun mifim ah ruah a si tawn tiah Bible nih a ti bang fim deuh na duh ahcun dai tein um law Pathian nih an zaangfah deuh lai. Laimi kan poinak cu kan hruhnak i fawh mihmai ah phozaar kan hmang tawn cu. Fimcawnnak le fimnak a duhmi, a upatmi miphun le ram poah cu an tthangcho deuh ko. Justice and Peace on earth!Credit-Van Tum

Be the first to comment

Leave a Reply

Your email address will not be published.


*