Lai Hlum Laimi Vs Ram Leng Laimi

Laimi ramdang ah kan peem nak a sau tuk rih lo nain Lai hlum Laimi le ramleng Laimi kan khuaruahning tampi ai thlau manh ti in ka hmuh. Aho deuh dah a dik i aho deuh dah a palh ti khi ka chim duhmi a si lo nain atu nai te kan far nu Sui Hlei Tial ruak an tuahtoning kongah kan cawlcangh ning nih khan a langhter ngai ko rua dah.

Lung cu a fak dih ko lai tiah ka zumh. Nain Lai hlum nih cun a tuar zia an thiam deuh kan ti lai maw lungfahnak an langhter ning a din ngaingai. Lung a si lo ngai. ‘A si awk a si ko’ ati mi tiangtiang hna an um le kha tu kha cu an luan tuk deuh. Ram leng ummi Laimi tu nih cun (keimah telh in) hitluk in Laimi kan hmun cia cung ah a kan tuahtomi cungah hin cun biataktein duhlonak hna langhter hna seh, lam hna zawh hna seh, a herh le luh a sianhlotu pawl kha a herhningin sualphawt si hna seh ti tiang hmanh khi kan duhning a si.

Hi ti lawmmaam kan i dannak hi zeidang siloin kan umnak ram sining ai dan tuk caah hlah maw a si ko rua ka ti. Zalonnak ram ah khua a sa cangmi le nuhrin covo ai fiang i a thatnak a tem cuahmahmi ramdang um Laimi le a min lawng Democracy i bunh tungin rialdit hruainak tangah a um cuahmah ko rihmi le nuhrin covo buarpiak cuahmah a si rih ko mi Laimi kan dirhmun le kan khuaruah cu i dan lo awk zong a rak tha deuh hrim lo bia si dawh a si bik ko.Credit-Lian Hram

Be the first to comment

Leave a Reply

Your email address will not be published.


*