LAI CHANG HE CHRISTMAS HMANNAK Christmas Chang Aa Thawhkehnak By Rev. Dr. Lal Pek Lian

Kan Siangbawi Dr. East nih a tial tiah Dr. Lian Hmung Sakhong nih an kan chimh chinmi cu “Carson Siangbawinu (Laura) nih Christmas caan ahhin kannih American mi nih cun cake (Changreu thlum phunkhat) kan ei tawn, Hakha ah Christmas kan tuah ve hna lai a rak ti. Cu lio ah Saya Sia Khaw hi Sakta ah cachimtu saya a si I, bawinu, kannih zong “Lai Chang” te in Christmas kan tuah ve ko lai,” tiah a rak ti an ti.

Kan laic hang tein Christmas puai cu an rak lawmh ve I, nihin ni tiang Christmas caan ah chang kan den, kan chuan, a thlep tete in ngakchia nih fawite in kan I ken khawh Ruava/zawlrit tiah kana uh, kan I vahpi khaawhnak lai an kan tuah piak. Chang hmanh ah a phunphun in kan nule nih an kan den piak; be chang, chang-kar, banhla chang, changpi, voksa he cawh in funchihmi chang, mumte chang, fatun chang, chihmui le Lai chiti toihmi chang, tbt, an si. Bancang hnahcang hna in funmi a si caah a haw te zong a thaw. Khuate lei ahcun fu an kan dangh chih, serthlum asiloah theithu a ngeimi khua ahcun a nuam chinchin. BYF nungak tlangval nih kan nule an chuan awk chang cu an den piak tawn hna. Hawikomh nak zong a tha.

Kan Lai nunphung nih a rak ngeih ciami chang nih Christmas, Kumthar, Thawhthan, le Thlaithar an thuamh tik ah cun aa dawh tukmi Chin Chang Recipe a chuak kho ve.

A biapi a si mi cu kan caah a thawbik, a tha bik mi he Christmas kan tuah mi hi a si. Laksawng kan I pe I nun kan I hrawm mi hi a si. Tukum Christmas zong hi kan chang denmi kha Paletwa lei kan unau ralzaam in a thin a phang I ei-awk a ngei lomi hna kan hrawmh ve hna lai. Laura siangbawinu le Saya Sia Khaw nih Lai chang in Christmas an rak tuahmi kha nihin Covid-19 pulrai le ral nih a kan den lio caan ah chang phun khatkhat tal in nunnak le siaherhnak hrawm kho ve ding in kan I tim cio hna lai.

Kan mino le nubu nih kan Khrihfabu innkio ah changtlep khat cio nan kan zamh khawh mi cung zongah kan I lawm tuk. Chungkhar in siseh, pumpak in siseh, chang kan ei lai ah kum 100 leng a si cangmi Lai Chang tuanbia te kha kan chim cio hna lai. Hi kokek kan chang tuanbia pakhat a um rih mi Changza tuanbia te zong kan faale kan chimh hna lai. Changza timi cu tho/hlukhla puai lio ah mithi an hunh mi hna chang a si I lehmah pakhat tia tete in den chang kha, 100 in an tuah I an hunh mi hna a si; cun ngakhcia kha an ei ter tawn hna. Changza a ngeimi kan si zong kha philh hna hlah usih.
Crd. Fidi Cazual IBC

Be the first to comment

Leave a Reply

Your email address will not be published.


*