Lai Ca Tialning ah ka Hmuhning

Phungthlukbia pa khat nih “Hmuhtonmi hi Cawnpiaktu țha bik a si” (Experience is the best Master) tiah a ti bangin:-

Pathian zângfahnâk thawngin Baibal he ai pehtlaimi Cauk, uk 40 reng lo Lai ca in ka țial hnu ah, cahmai 1500 dêng mâng a simi Baibal ka hun țial țhân tik ah ka hmuhtonmi (experience) hna nih Lai ca țialning he ai pehtlai in Lai ca a țialtu hna nih ‘a’ pahnih (aa) le ‘e’ pahnih (ee) le ‘i’ pahnih le ‘u’ pahnih (uu) hna ningcang te i kan rak hman lomi hi fiang tein ka hun hmuh.

Hi cafang phun li aa, ee, ii le uu hna hi bia i kan chimning tein ca in țial hei si seh law cahmai 1500 hrawng a simi Baibal hi a tlawm bik ah cahmai 1600 a si lai i cahmai 100 cu a hlei in chap a herh hrim hrim lai ti kha fiang tein ka hun hmuh.

A dang pathum hna cu chia ta in ‘a’ pa hnih (aa) lawng hmanh hi ningcang tein kan hman ah cun Baibal ah hin cahmai sawmli hrawng cu a hlei in a dih a herh lai.

Tahchunhnâk ah dik lo ngai in ‘nak’ tiah kan rak hmanmi, khamhnak, tlanhnak, dinnak, sualnak ti te hna hi ‘a’ pahnih (aa) lawng te khamhnaak, tlanhnaak, dinnaak, sualnaak tiah hman ding a rak si nain ningcang loin ‘a’ pa khat lawngin kan rak hman.

Zeicatiah ‘a’ pakhat lawng a si ah cun ‘naak’ si lo in ‘nak’ a si.Țha te ruah bu in duhsah tein a tanglei catlâng tawi te hi hun rel hmanh:-

Rang nak naak in Rang raang ai dawh deuh. ‘Rang nak’ (Black Horse) timi hnu ah ‘nak’ timi kha ‘a’ pa khat lawngin kan hman ah cun ‘nak’ (black) veve a si i sullam a ngei ti lo.

Khualhring Tlaang ah Tlangte khua a um
A hmasa deuh ah ‘Tlaang’ timi ah ‘a’ pa hnih (aa) a um lo ahcun ‘Khualhring Tlaang’ timi kha ‘Khualhring Tlang’ ti a silai i ‘Tlangte’ timi ‘Tlang’ he ai khah ah cun sullam a ngei ti lai lo.

Cucaah nak le naak, tlang le tlaang, rang le raang ti te hna le a dang dang zong bia i kan chimning tein ca in kan țial a herh ti hi Lai ca țialning ka hmuhning a si.Ka peh țhân te lai.By-Evan Rual Uk

Be the first to comment

Leave a Reply

Your email address will not be published.


*