Kum 14 ka rak si lio ah Thailand ngakchia thong ah ka naule he a kum kum in kan rak tla.

Nun harnak phunphun ruang ah; Na lung a dong maw? Ruahchannak ngei loin na um maw? Thi ning ti khi na duh maw? Na hmailei na zoh ah a ceumi hmu loin a muimi lawngte a si maw? I thah hi ka hrang ah a ṭha bikmi biakhiahnak a si ko ti khi na ruat maw? Cucu kei zong ka rak ton balmi le ka rak ruah balmi a si.

Kum 14 ka rak si lio ah Thailand ngakchia thong ah ka naule he a kum kum in kan rak tla. Zeitik hmanh ah nan chuak kho ti lai lo tiah an rak kan ti. Malay lei le lanh khawh lo, Laitlang le kir khawh lo. A karlak ah kan rak i taap. Zeihmanh kan tuah khawhmi a um fawn lo. Atu hi khoika khua le hmunhma ah dah kan um ti hmanh kan rak hngal lo. Cu i thih hlan lo ngakchia thonginn i um ding ka rak ruah ah lung a rak dong. Ruahchannak a rak pit i ka lungthin tha a rak dih cikcek. Ka hmailei caan ka zoh ah ruahchannak mei hmete hmanh a ceu lo. A mui dih hirhiar. Thihnak lawng hi ka ca ah a phi ṭha bikin ka rak hmuh. «Zeitin kaa thah lai?» Cucu chunchun zaanzaan in ka rak ruahmi a si. Cutin khua ka rak ruah lio ah biahalnak dang a rami pakhat cu «I that ning law hodah ka naule a zohkhenh hna lai?» ti hi a rak si. Cu te nih cun a rak ka khamh.

Pathian nih cozah rian ṭuantu hna hmang in June 10. 2010 ah Norway a kan phanhter. Holh ka cawng. Sianginn ka kai. Laam hna ka cawng. A phunphun ka duhmi ka tuah. Sianghleirun ka kai. Cutin ruahchannak a rak baumi ka NUN-HRAI kha ruahchannak ṭha ṭha in a khahter i, a rak mui dihmi ka hmailei lam hna cu a ceuter hna.

A caan ahcun a tu lio i kan tonmi thil ruang ah nunnak i lak duhnak thinlung hna hi kan ngei tawn. Nun nakin thih hi a ṭha deuh in kan hmuh tawn. Kan mawh hrimhrim lo. Lung dongh timi le ruahchannak ngeih ti lo timi hi a fak tuk ngamsammi le a rit tuk ngamsammi a si. Asinain kan philh lo awk cu caan a hun kal cun zeipaoh hi an tluang ṭhan zungzal ko. «A si kho ti lai lo.» tiah kan ruahmi hna khi kanmah ruahnak sawhsawh men lawng an si. A si kho thai taktak lai lo tinak a si lo. A cheukhat cu caan tlawmpal ah an ṭha ṭhan i a cheukhat cu caan zeimaw hngah an hau. Asinain a donghnak ahcun an tluang dih ṭhan zungzal ko. Cucaah a tu lio na ruahchannak hrai kha a lawn zongah a lawn bu tein i put ko. Ni nikhat ahcun ruahchannak ṭha ṭha in a khat te ko lai.Credit-Roro Fambawl

Be the first to comment

Leave a Reply

Your email address will not be published.


*