“Khuami lung vaivuan in nan kan tuah.Atulio boruak kong ah Hakha khuami cheukhat awka

Nihin kan ram boruak he pehtlai in Hakha khuasa khuami cheukhat awka kan hun langhter.

“Innpa chakthlang aa chawn bal theng lo mi zong kan hun i chawnbia ngai hna. Kan ceih mi tu cu zapi hngalh a si ko. Khuataw ah voih kha khualu ah ek an canter i internet line a hmang kho ve lo mi le facebook hmang thiamlo kannih tepawl cu chunzaan chimlo suimilaam pakhat kar ah kan khuaruah le biachahnak aa thleng peng ko. Lungrawk ngai kan si,” tiah Hakha Sang pakhat in upa pakhat nih The Hakha Times ah a chim.

Hi kong ah min langhter lo mi upa ngai pakhat nih, “Facebook nan ti mi nih hin hna a kan hnawh tuk cang. US um ka fale nih hin a langtlang in thawng an kan thanh khawh deuh. Zaanlai hna ah hin lau lengmang in an kan chawnh le cuticun facebook ah an tial. Rak zaam u, rak i dor u, khur rak co u, rak i ralring u, ti lawngte si ko. An chimning in le thil pakhat hmanh a cang bal hoi lo. Facebook nan ti mi hi lih le hrawkhrol chim/ tialnak a si ko rua aih,” tiah a chim.

“CNA nih April ni (…) ah an kah ve cang hna lai. Hakha le Thantlang hrawng cu a bi tuk fawn. Ralkap nih helicopter in bomb an thlak lai i kan thi dih ko lai. Mino zaangthawng deuh cu hriam an tlai dih cang an ti. Tarnu tarpa le nunau lawng khuahngak kan si. Zeitinhme kan si kun lai kan ti. CNA nih kah ve ding a nicaan an thanhpiak mi hna zong ah an i kap fawn lo. Zingbia le chunbia hmanh kan thleidang kho ruam lo. Aho bia cu dek kan zumh bik ti rua hnga. Hawi thinphan le thlalau lio ah,” tiah upa pakhat nih a chim ve.

Media riantuan pakhat nih, “Social Media pawl nih hin an kan nawnnok ngai. Hiti ti tik ah kanmah local media kha kan tling bik bak lo nain an chungkhat le hawikom chimchin mi luklak, cu hmanh cu anmah nih hmuh mi le theih mi si loin mi biasiphai mi kha an chimchin i cucu Social Media ah hawihlei thawngpang thei hmasa bang post zokzok kha an i zuam. Cu nih cun media kan limhaang zong a zorter pin ah kanmah local based pawl hi santlailo bik ah zapi zaraan nih an kan hmuh. Tarnu tarpa le nunau lungrethei in a kan chiatu hi Ralkap tluk tein Social Media tam deuh hi an si ve. Cun, Citizen Journalist (CJ) kan laar ngai. Atu bantuk boruak lio ah hin media riantuantu lawng kan i phazo kholo i CJ hi a herh tuk. Asinain, biadik le diklo thleidang lo bak in kan timeline cio ah kan phozaar i cu zong cu Social Media tam deuh nih ar-rawl cuk in an cuk hoi. Local based media kan santlaihlo chapchap ah an kan vaivuanh bak ko,” tiah a chim.

“Kei cu a chim zong ka zuam lo aih. Thih caan phanh si le kan thi te ko lai. Facebook ah ka rel, cutin khatin an ti mi a tam tuk i a zei set hi zumh awk zong ka hngal lo. Daite um tha deuh,” tiah min langhter lo nutung pakhat nih a chim.

Mino pakhat nih, “Laimi hi cu kan poi deuh. Mifir nih khin thil a fir lai ah anih techung thil ka va fir lai, tiah a chimcia bal lo. CNA nih cu nithla ah an kah ve cang hna lai tiin a nicaan dikfel he ca an tial. Ralkap nih cu tik ah cu ni ah kan kah hna lai ti cu an chimcia bal lai lo. Cu ruang ah ni khat lio cu kannih khuami tam ngai vawlei khur cawh mi ah an luut. Zeitluk in dah biasiphainak le biavaivuan nih kan thinlung a hnursuan ti hi ruah ngaingai a herh. Ramdang um pawl ko nih hin kan thin an kan phanter. Ramtha kan um ti phun in an aukhuang tuk i an kan vaivuanh tuk deuh,” tiah a chim.

Atu bantuk in khuami cheukhat (mitlawmte) awka kan langhter mi chung ah tial awk tha deuh lo an bia zong a um len ca ah a cunglei awka vial kan hun langhter.The Hakha Times

Be the first to comment

Leave a Reply

Your email address will not be published.


*