Khua hi kan chuahnak khua in ai thok mi a si! Cu khua cun hram a sih dihmi an si.

Khua kan ruat. Khua chungin ruahnak ai peh caah a si. Cunakin a thuk deuh mi cu khur ai tel i khurkhuaruah a si. Khur cu cawh a haumi a si caah khuaruahnak zong ah thuk deuh in ruahmi kha khurkhuaruah an ti.

Khua kan khang. Cu khua i an khan mi kha khuakhan an ti. Laimi kong an chim an rel mi kha khuakhan lairel an ti. Khurkhua kan ruahmi, khua kan khan lai kan rel mi hna zong hi khua tiang lawng ai hngat tawn.

Kan biakmi , kan tihmi, kan tluanhtlamhmi kongkau zongah khua he ai pehtlai dih. Khuazing, khuachia, khuahrum, khuavang hna an si. Khua in ai thokmi, hram a sih mi an si dih.

Nifatin kan tohmi ni le kan umnak khua kan fonh i nikhua kan ti! Cucaah nikhua a chia, a tha kan ti. Khua a sik, khua a lum kan ti. Zanmuihnak in zinglei ni ceu dawh kan hmuhnak ding ah khua a dei kan ti!

Khua in hram a sih dihmi a si caah mah le khua cu kan dawt dih ! Khua in a tthangmi kan si caah kan dawt, kan tlaihchan, hnakkar ah kan tenh dih caah khua leng in khuaruah khawh hi kan iharh ngai cio!

Khua in midang a kan tlungmi kha khual kan ti hna. Thil pipa ton tikah Khual ruahnak cu cohlan kan duh set lo. Khua kek deuh ruahnak lawng kan duh! Khua ah K timi keimah, kanmah timi telh lo , hrelh ahcun Hua a tang I kan ihua dih.Credit-Ca Cung Bik

Be the first to comment

Leave a Reply

Your email address will not be published.


*