Kaya Biakinn SAC Ralhrang nih an Kah, Minung 4 an Nunnak a Liam

Nihin zinglei sml. 1:00 hrawng ah Kaya ramkulh, Lwaikaw peng, Kayanthayar khua i Roman Catholic biakinn cu SAC ralhrang nih bomb in an kah caah a chung ah aa thupmi nu 3 le pa pakhat an nunnak a liam.

May 23 zaanlei thawk in SAC ralhrang nih Lwaikaw khua cu raldohnak Tank le motor tampi in an kal hnawh i, khuachung ah meithal kah thlorh in an kah len.

May 23, Kaya ramkulh chung kahdohnak ah SAC ralhrang 40 hrawng an thih hnu ah atu bantuk in SAC ralhrang nih thazaang tampi in an rak fuh hna hi a si.The Chin Journal
May 24, Yangon Photo-CJ

Thantlang SAC Ralbawi nih Voi 2 na Kan Kah Cang tiah TBC Mino Sin ah Chim .Nihin (May 23) Zarhpi zing pumh dih ah Thantlang Baptist Church (TBC) mino le SAC lei biaruahnak an ngei i, voi 2 bak na kan kah cang tiah SAC ralbawi nih a chim.

Nihin tonnak ah aa telmi pastor pakhat nih, “Pumh pah biaruah kan in duh hna a kan ti. Asinain, pumh lio ah cun a si kho lo kan ti i, pumh dih tu ah mino Choir Bu he biaruahnak kan ngei hna,” tiah The Chin Journal ah a chim.

“Ralkap bawi nih nizaan he cun voi 2 bak na kan kah cang tiah a chim. Asinain, aho nih a kan kah timi cu a chim lo. Laipawnglung lei in an ra i kan sakhaan ciacia ah a kan kah tiah a ti. Kannih cun daihnak kan duh, i kap hlah u sih, kan tlaihmi hna zong kan in thlahpiak hna tiah a chim,” tiah a cunglei pastor nih a chim chap.

Aluancia May 5 ah khan Thantlang-Hakha karlak ah SAC ralhrang pawl kah an rak tong. May 6 ah Thantlang ralkap nih Thantlang upate tonnak an ngeih hna i Thantlang mino pawl kan cawnpiak hna u tiah an rak chimh hna.

CDF-Hakha nih “Kanmah nih Thantlang-Hakha karlak ah SAC ralhrang kan kah hna,” tiah cathanh an rak chuah.

Nizan (May 22) zaan zong ah Thantlang ah bomb puah thawng le meithal kah thawng pawl a thang len. Asinain, nizaan bomb puah thawng le meithal puah thawng kong ah ahohmanh nih kanmah tuahmi a si, tiah an chim rih lo.

Nihin tonnak ah TBC mino lei zong nih SAC pawl sin ah biachimnak an ngei: “Meithal na kan puah hnawh lengmangmi hi mipi nan lauter hna. A herh lo ah meithal kan puah hnawh ti hlah u,” tiah an chimh hna.

Nihin tonnak ah Thantlang SAC ralbawi, palik bawi le uknak lei zung (GAD) in penguk zong aa tel.

May 6 tonnak lio ah Thantlang upate nih, “CDM a tuahmi pawl tlaih loin um le nan tlaihmi minung pawl vuak len loin nan um ah a ttha lai. Aruang cu Laimi cu meithal tampi a ngeimi kan si i, sa zong a kap lengmangmi kan si. Meithal konglam a theimi kan si. Cucaah, nanmah lei nan daih lo ahcun Mindat ah a chuakmi thil bantuk hika zong ah a cang lai lo ti khawh a si lo,” tiah Thantlang SAC cu an rak chimh hna.
The Chin Journal May 23, Thantlang
Hmanthlak: March 2, Thantlang khuachung ah hmuhmi SAC palik pawl.

Be the first to comment

Leave a Reply

Your email address will not be published.


*