Kawl ralhrang meithal tha le uniform tha he an um lioah lai meithal le hriamnam thilthuam hmanh ngei loin ralthatnak he dohtu nusal pasal tha hna nan lungput hi cawn tlak a si.

Nan Liam siaherh cio ko lai mu.Miphun le ram caah nunnak petu vialte upatnak sang bik kan pek hna. Nan pumsa in i tel kho ti hlah hmanh uhlaw nan rauthla tal in kan telpi hram ko uh. Nan taksa cu um ti hlah hmanhsehlaw nan min chim le nan kong chimrel lei hmun chung kan dai ti lai lo.

Kawl ralhrang meithal tha le uniform tha he an um lioah lai meithal le hriamnam thilthuam hmanh ngei loin ralthatnak he dohtu nusal pasal tha hna nan lungput hi cawn tlak a si. Minung sinak in hriamnam tha ngei loin ralhrang dirhnawh cu nan ngamh hrim lai lo nain miphun le ram himnak caah keimah ka dir lo ah tiah pasal kamseh in thingtang ramtang ah ruunrep ngei lo le nu le pa ngei lo bang thlam chia te sak in zingzan ei chung pil kho loin ruahsur le thlihran lakah ih merem kho loin miphun le ram himnak caah midang rinh loin kan no lioah tiah zaanghlei nan cuai. Minung sinak in ttihnung ralhrang le hriamnam cu ram le miphun dawtnak thinlung in nan dirhhnawh hi cawn tlak nun a si. Amah belte hi tlukin miphun le ram dawtnak he ramtang ah pawttam tuar le ih merem loin riahlang va bang nan hram lio caan ah kan miphun hawi cheukhat hna miphun leirawitu an rak um ve belte cia poi hringhran ko. Leirawitu hna tuanbia a hmun ve te lai tikah techin fapar chan ah an techin fapar hna an ningzahnak a cang te ko lai.

Hringtu nu le pa hna le khuami hna nih kan fanu/pa te kha nundam in a um hnga maw? tiin ih merem kho loin khuaza an ruah lioah na fapa cu ralhrang kut in a thi e ti thawng theih cu a fawi hrim lai lo mu. Sihmanhsehlaw miphun le ram caah nunnak petu na sinak cungah i lungsak zia thiam mi si a herh ko. Hringtu nu le pa hna le innkhar tung tlaih in an hram. Nupi le mitthli he vale caah ni le thla an rel. Chungkhar nun ttian in thih ttian ton lai ruah ah thinlung nih a ngamh hrim lo nain kan dohmi lo hma hi i ngol thiam kan si ti lo timi nih lungthawnnak a  kan pek. Nihin ah nunnak liam in mitthli tla ko hmanhsehlaw pasal tha nusal tha he nan ralthatnak teinak a kan phakpi tikah kan lunlawmhnak mitthli tu a luang te lai.

Miphun le ram caah tiah ramtang thingtang ah chungkhar kaltak in lai meithal he ralhrang dohding ah nunnak a thap cangmi kan hawikom mino tha hna nan lungduh le nan ruahnak tlukin hma a kal lonak um kho men. Saduhthah le chunmang tampi he miphun le ram a thatnak caah hin thihnun in hmai kal ning a titu pasal hna nih nan saduhthah le nan chunmang tlamtling hlanah nan liam tuan tikah nan liam siaherh hrim ko lai. Nan lohma bang takmi cu nan miphun hawi hna nih a lamkip in teinak kan hmuh tiang kan ttang tti ko hna lai. Hmailei zongah nunnak liam in thisen a luang rih ko lai tikah tu tein lung i hnemhzia thiam kan hau ko. Mino ttha hna kan dohmi ralhrang a dih hlan le kan duhmi Federal Democracy lam hmuh hlan chung cu hnu kir hin loin hmai kan norpi hram ko uh.

Thih cu nan ttih bak ko lai nain nan ttihmi thihnak nakin a ngan deuh mi Miphun le ram dawtnak nan ngeihmi hrim hi tuanbia tha cawntlak a si. Kamlo chuncha bang dir chin ko hna u sih. Hriamtlaitu, chawva petu le thlacamtu tiin kan dihlak kan ti khawhnak zawnte chuah in kan ttang hna lai i kan tei zau ko lai.
Nan tlei thawng theih cu nan miphun hawile vialte kan ngaichia i kan mitthli a luang. Chunceu cu kan hmuh nain kan nunnak a mui i kan in siang hrim hna lo. Nan liam siaherh ko lai nain nan lohma bang kan pehzulh ko lai.Upatnak kan pekmi Chin heroes.By– Salai Pa Thawng

Be the first to comment

Leave a Reply

Your email address will not be published.


*