Kawl mi an har lo kan ti nak si lo in Ralkap nih uk ciocio ah kawl mi le tlangcungmi kan sining aadannak kha theihthiam khawh an izuam bal lo.

A tu lio acang mi thil ah khuadawm nih aphanhmi muih nak le zatlak nak lawng te ruah ah cun thaw a pit. Thaw hun ichuah pah in minmei a ki kamhtu ceunak tete ruat ve hna usih.

Tutan dothlennak ah a hmunhma ah ka um kho lo, lam hla in ka cuanh i hihi cu dothlennak kan tei rih hlah hmanh seh law kan ihlawknak thil an si tiah ka ruah mi thil pawl an um len. Cuhna lak ah a pipa tiah ka ruah mi pahnih te hun langhter ka duh.

Khuapau Dothlennak ruang ah Kawlrawn um mi nih tlangcungmi kan rak temtuarnak le mah tein khuakhan lairel khawhnak nawl kan halnak a ruang an theihthiam cang ti mi le Tuluk thilchuak cawk hrial (boycott) in mah khua le ram a chuak mi thil lawng cawk/hman ding ti in hun aupi cio mi kong hi asi.

Kawlram a thang mi le Art/Literature/Film/SocialWork fields pawl ah kai teltum, bu cawlcanghnak pawl ah ka active ngai tawn caah kawlram ah cun network kau ngai ka ngei. Cu network pawl ah cun tlangcungmi asi lo mi kawl mi hi a tam lei cu an si peng tawn. Tikah tlangcungmi kan temtuarnak kan harnak kong kan chim tik paoh ah nanmah lawng a tem mi nan si lo kawl mi zong a har mi tampi kan um ve ko ti hi an ka ti tawn mi asi. An chim duhnak cu Ralkap tha lo hna ruang kawlmi hi nan kan huat, kawlmi ah a sifak mi le a thangcho lo mi kan tampi ve ko ti khi asi peng.

Kawl mi an har lo kan ti nak si lo in Ralkap nih uk ciocio ah kawl mi le tlangcungmi kan sining aadannak kha theihthiam khawh an izuam bal lo. Asinain a tu cu, an mithmuhnak khuapi chung ah meithal thawng an hun theih, ralkap nih chun he zan he duh paoh in an um hnawh cang hna hnu in ahlan i an itheihter lo mi vialte kha pheh awk tha ti lo in an ifiang cang.

Ahlan an Kawl le Tai-Hin-Ta ti in a then tu chung in Kawl zong Tai-yin-ta pakhat kan si ve tiah a pom mi an tam deuh ngai cang. Cucu mah ka hawile an fb status le GSCN cawlcanghnak le, CRPH post i an comment pawl ah hmuh khawh asi. Cu pin ah adang Tai-Yin-Ta cu Thantar (Flag) an ngei dih kan mah kawl miphun lawng a ngei lo mi kan si ti in Thantar zong an suaisam lem mi ah hmuh khawh asi. Burmanization kan doh lai tiah an mah kawl mi cheukhat sin in hun theih asi cang tik ah hihi kan Ram caah Khuapau Dothlennak nih a chuah pi mi thil tha ngai pakhat asi tiah ka hmuh.

Apahnih nak ah Tuluk thil Boycott tuah in kan ram chungchuak thil hman ding ah a aupi mi an tam chin thluahmah cang. Kawl ram chuak mi thil pawl zong cazin an tuah i an hun phozar len cang. Culak ah Laitlang ah tah kan ram chuak thil zei pawl dah a um ti hi aka ruah ter.

Zaran nih eidin bik mi facang, chiti le pe tbk Kalay le Monywa/Mandalay lawng te in an hun kan ngalh. Kan tlanglo facang pawl nih chungkhar pakhat a kum in akan khimh maw? Mehhang Tisik anhnah tling in a chuak maw? Thingthei tah phuntling kan ngei maw? Kumkhat chung ah thingthei phun zeizah dah kan ei khawh?

Lai khuate tam ngai cu ka rak phan bal ve i laitlang ah a chuak mi a um lo ti ruahnak hi ka ngei ti lo. Khua khat le khuakhat a chuak mi thingthei le eidin aadang cio i tuak ah cun aphun cu atling ngai ko. Asinain lam le sul chanbau ruang ah marketing kan tuah khawh lo caah hmunkhat ah atling in kan hmuh khawh hna lo mi asi tiah ka ruah.Shan lei nih an ngeih mi ninga ah vawikhat bazaar kai ni (ငါးရက်တစ်စျေး) tibantuk khin Hakha si lo le anaihnak bik khuapi pakhatkhat zong ah um kho ve seh law zarhkhat vawikhat tel Khuate kip in mah le cinthlak cio zuarnak hmunhma hna iser kho seh law atha tuk lai tiah ka ruah.

Asilole Rangon ah an tuah tawn mi Farmer’s Market ti bantuk in Hakha khuachung le anaih nak khua in dum le lo ngei tu hna nih an cinthlak le nga le sa hna hmunkhat ah hun kan zuar piak hna seh law mipi ca zong ah eidin thim awk tam ngai a um ko hnga ti khi ka ruat tawn.

Ei le din lawng zong si lo in buk, sei, sawng, tuhmui, namtawng tibantuk inn chungkhar le khuasaknak ca a herh mi thilri pawl zong tuluk ta hman ti lo in mah te in ser chuah than siseh law ava tha tuk hnga dah. A tu ah mitlawmte lawng aum cang mi zungthiam hna sin in cawn than khawh asi rih. Ka phanhnak khua ah ka chimh tawn hna tik ah Hriphi lak a har, rua le mau kawl a fawi ti lo, pawcawmnak ah aa kite lo tibantuk lawngte ka rak theih tawn. Aa kite ding in zeitin kan tuah hna lai ti alam kawl caan asi cang.

Thiamtak hna zong nih kuttah lawng si lo in man fawi deuh in zuar khawh ding ah thiamsin he ti in zapi zaran hman ding hni, puan aphunphun chuah ding. La cin le labuh tehna zong kan thlau nak asau cang i ahram thawk caan a cu cang ko lo maw? Atak ah cun 2020 lio te in Aidii nih thiamsin dirh kan itim nain Covid nih akan hloh i a tu cu MAL le a hmawm mi hna ruang ah a zual cang. Hmailei zeitin kar kan hlan lai ti cu kan ruat cuahmah ko.

Chimduhnak cu adang si lo in tuluk thilri hmang lo in kan um khawh tuk ding asi ko lo maw ti hi asi. Tutan thil sining ah kan cung i an lungput cu fiangphut in alang ko (ahlan ah athei lo mi an um len hmanh ah). Kan ka le kan FB in Tuluk kan ti len tung hna i kan phaisa hmuh mi paoh an thil cawknak ah akal ah cun asi kho deuh lo.
Pau Dothlennak ruang ah Mipi caah hmantlak mi hman nuam mi kan ram thilchuak atam chinchin nak ding ah lam sialtu pakhat asi tiah ka ruah.

Cu hna cu muinak le ngeihchiatnak in akhat lio mi thil sining ah athat lei in ka hmuh khawh mi hna an si. Nangtah zeitin na hmuh? Ka hrawmh ve te. By-Aidii Anna Biak Tha Mawi

Be the first to comment

Leave a Reply

Your email address will not be published.


*