Kan Tefa nih kan sinah lomhnak bia an chim te lai.

Tulio Hakha Mino kan cawlcanghning cu Hakha tuanbia ah a um bal lomi a si. Kan lung aa rual, kan i biatak. Kan duhmi ca ah thih kan ngamh. Hihi Vakok lungthin ngei kan sinak kan langhtermi a si. Pakhat cio nan dihlak cung ah upatnak kan in pek hna. Ralrang pa cu nikhat hnu nikhat a thin a phang. Mi a ttih cang. Tlawmpal ah ni nih tikhal a kah i, a tti dih bantuk in ralkap cu CDM nih a tei cang lai.

Hihi a fiang tukmi a si. Cucaah, zei kan si hmanh ah kan dihlak te in CDM ah kan i tel hna lai. Aa tel lomi zong nih rak kan telpi u. Kan paw ca ah a si. Kan ram ca ah a si. Kan thangchonak ca a si. Nangmah ca ah keimah ca a si. Pumpak duhnak lawng ruat lo in ram ca ah ruat hna usih. 1962 in nihin tiang ah kan ram cu pumpak ca ruahnak nih a hrawh. Tu cu kan ram le rammi kan ca ah ruahchannak a hung um cang. Ralkap kan hloh lai. 2008 phunghram kan hrawh lai. Federal Democracy in ram kan ser lai.

Hi CDM ah kan i telmi hi thluachuah a si. Aruang cu ram sernak ah kan i tel khawh ca ah a si. Ramdang ram minung tampi nih ram sernak ah tel an duh ko lai. Nain, a sunglawimi dothlennak ah an i tel kho ti lo. Aa rak telmi lawng kha an upat, an uar hna. An idol ah an i chiah hna. Kannih cu nihin caan ah a sunglawi tukmi ram sertu dirhmun ah kan um. Hihi thluachuah a si philh hlah usih. Kan tefa nih ” kan idol” an kan ti te lai. Kan tefa nih kan sinah lomhnak bia an chim te lai.

Kan ram cu kan kut in so ser bantuk in kan ser lai. CDM i telnak in ralhrang cu kan tei lai. Lungrual nak cu kan teinak a si.
Credit-CDM Supporting Team For Hakha

Be the first to comment

Leave a Reply

Your email address will not be published.


*