Kan nih Chin mi hi teh online lawngin maw kan i hrocer rih lai asilo ah kan lungfahnak hi um hmun lawngin maw kan i in ko lai, asi loah mi mawh chiat awk lawng maw kan bawh ko rih lai?

Na lung a fak ve lo maw?Minung asi poh lungfah thiam lomi kan um loh, a zawn le aruang tu langhter thiam a hau tawn i a caan te ah tuah herhmi tuah ve ahau. Cucu sullam a ngei mi nun asi i cu nih cun hmai lei ruahchannak zong a umter. Saram hmanh a fa chuh ahcun thih ngamh in a cawl ti si.

Minung asi ve komi hramhram in namh neh, hrem le thah, tleihhrem le nung na ngakttah dir hmun an kan dir ter chung hi a tawi ti loh. Inn le lo hmanh hlum thiam loin rum rep loin vaih caan zonghi a sau cang. Mah duhthimnak hman cu chim lo duhlo mi rumro hnek le tuan ter caan zong a sau cang. Ruah ah nun nih a celh ti lo i thinlung nih atuar kho hrim tilo.

Zumtu kan thlalang asi mi Israel zong kum 1517 to 1917 tiang cu an ral asimi Ottoman Empire tangah an rak um ve. Sinain Judah mifim Theodor Herzl nih an temtuar nak a zoh sawh khawh tilo caah 1897 ah Zionism timi a rak chuah.

A sullam cu kan Pathian pek khua lipi kan pu David khua hi cuarpar tan lomi hna kut ahhin maw a um peng ko lai kan Pathian khua thianghlim cu tihin maw kan zoh sawh ko lai? Luatternak dingah kan mah kut ah pek kan si lo maw? tiah statement arak chuah i vulei cung Judah mi vialte sinah a rak kuat hna. Cu hnu ah ram dang um Judah mi rum nih meithal hriam nam an cawk i an mah Judah mi kha athli in an pek hna. Filistin pawl theih loin vulei khur an i cawh i hriam nam tling he hmun hma an rak la an thazang ahung tlawng i teinak tiang an hmu.

Kan nih Chin mi hi teh online lawngin maw kan i hrocer rih lai asilo ah kan lungfahnak hi um hmun lawngin maw kan i in ko lai, asi loah mi mawh chiat awk lawng maw kan bawh ko rih lai? Mi nih sal bantuk in an kan tuah caan asau cang lo maw? Pathian pekmi kan ram le chum tual ah cuarpar tanlo pawl cu maw zalong in an cawl ko rih lai? An mah ruangah nauta le sifah kan tuar caan asau cang lo maw?

Kan pasal tha, kan khuabawi tlang, kan mifim hna zeizat dah thong thlak le thah an si cang, kan ngaknu dawhdawh zeitluk in dah an pam hmai i nu le pa thlumh alh ve mi sem mawng rual zeizat dah ngakttah ah an can cang. Mi mithmai zoh in mi nu kha ka nu an ti mipa kha ka pa an ti. Sal bantuk in rian an kan fial, an kan chuih lamh hnu ah kan neih lo chin Vok Ar an kan chuh. Fa hniang ei ding Arti pum tiang hmanh an kan chuh. Na lungfak ve lo maw?

Mah bantuk tuar than ding cu an ruah khawh tilo caah kan ram chanhchuah dingin CNA kan ralkap an dir ve. Sinain mipi kan derthawn ruangah tleihtling hmanh in hriam kan pe kho hna lo. Tlang cung hriamtlai dang le kawl ralkap hna zoh chuk awk le capo seih awk men hna in kan chia sual hna maw tihi ruah ahau. CNA an serset hna cu Chin mipi serset asi. An nih nih an nun an thap lioah mipi nih an herh mi kan tum ve awk asi. Na lungfah velo maw,?

Pathian pekmi kan ram le miphun hi kan mah tein ven him le chanh chuah dingin Bawipa nih a kan duh. Israel miphun bantuk in kan mah tikhawh tawk cio chuahin minung thazang in siseh chawva in siseh kan tuan can a cu cang.

Modekai nih Esther cu atu caan i dai tein na um ko ahcun nang le na pa inn chungkhar cu hlawt nan si lai. Esther 4:14.Credit-Van Bawi Kam Zaitu

Be the first to comment

Leave a Reply

Your email address will not be published.


*