Kan miphun nih Dobrev nunning dawh i cawn cio hna u sih:

Dobrev cu July 20, 1914 ah Bulgaria ram Bailovo khuate ah a chuak. A pa cu a voi khatnak vawlei ral lio ah a thi. A pa a thih hnu in a nu nih a hmeih pi hna i, harsa ngai in khua a sa mi an si.Dobrev nih a no lio (sianginn a kai lio ) hi fiang tein aa cin ken lo.

1940 kum ah nupi a ngei. Vanchiat ah a voi hnih nak vawlei ral lio ah bom thlakmi cu  a pawng ah a tla i cu nak cun aa hna cheh hram a thawk. Bom nih a puah hnu in a hna hi a tha ti lo. 20 July 2014 ah kum 100 a tling cang. A mah le a si khawh tawk tein lam kam ah thu i mi sin ah bawmhnak a hal hna.

A hmuhmi chungin pia-khat te hmanh a mah caah hmang siang lo in a kawn i mi dang caah a hlut. A mah kong a tialmi nih an chimnak ah tuchunni tiang ah a harsa mi le Khrihfa biaknak caah a hlut mi hi an mah Bulgarian tangka in 80,000 a si cang. Euros in cun 40,000 hrawng a si cang.Kawlram tangka tlen in kan tuak a si ahcun Kyts 50317017.49 a si hnga.

Kum zakhat mi hmanh nih hi bantukin a mah le a si khawh tawk tein ram le miphun ca le, mi harsa caah teimak a chuah mi ka hmuh tikah tuchun ram thangchonak ah a thang cuahmah mi hna  kan laimi mino pawl le Chin MP pawl zong nih kan ruah caan a za cang. Mah ca miatnak, mah ca thatnak, mah ca thangthatnak hmuh,mah ca lawng ah khuaruah le khuakhan le khuasak hi kan kal tak can a za cang. Kan miphun  nih Dobrev bantuk in ruahnak tha, mi bawmh duhnak lungput kan  ngeih a si ahcun kawlram ah sifak bik kan chin ram zong hi a thacho ve ko hnga ti mi ka ruat.

Baibal nih ih can a si ti lo, thawk can le tuan can a si cang tiah a kan chimh bantuk in kanmah le kan si khawh tawk tein thluachuah a kan petu Pathian ca le kan miphun le kan ram caah tuan ve cang hna u sih tiah kan sawm hna. Bawipa nih thluachuahnak in pe ko hna seh.
Credit-David Van Dawt Thawng

Be the first to comment

Leave a Reply

Your email address will not be published.


*