Kan Khrihfa nun in midang nun thlengkhawh i zuam ve hna u sih.

Matthai 5:16, “Cu bantukin nannih nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai.”

Lamkaltu 1:8, “Asinain Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai, tiah a ti hna.”

(1) A luancia kum zeimawzat lio ah khan David Livingstone (Scottish missionary-1813-1873) kong Lai ca in an ttialmi ka rak rel bel. David Livingstone cu Africa ram ah missionary a rak ttuanmi asi. Mah missionary a ttuannak ah vom nih fak ngai in a seh ti si. An ram UK ah a kir i a hawile pawl cu a rian missionary chawngding in a fial hna/a sawm len hna nan ahohmanh nih an pom lo. A dam deuh in Africa ram ahcun missionary rianttuan ding in a thawh tthan ti si. Africa ram i missionary a ttuannak ahcun ramlak ah thlamte a sak i a um. David Livingstone nih Africa ram i missionary rian a ttuannak kongcu The New York Times i a ttuanmi M.Stanley timi pa nih a theih tikah interview tuah i a konglam ttialding in amah David Livingstone sin ahcun thlaruk te bak a um hnawh ti si. M. Stanley hi Khrihfa a si lo.

Biaknak nei lomi a si kan ti lai cu. David Livingstone cu missionary rian a ttuanmi a si ko nan voikhat hmanh Bawi Zisuh kong le khamhnak thawngttha kong cu M. Stanley a chim ballo ti si. Asinan thla zeimawzat a rauh hnuah M. Stanley cu Khrihfa ah a cang ti si. Amah cu Khrihfa a cannak kong an hal ve tikah a lehmi hna cu David nihhin zeitik hmanh ah Khrihfa kong le Bawi Zisuh kong zong a ka chim bel lo i Khrihfa i luh ding zong a ka sawm fawn lo nan amah David Livingstone nunnak le thinglungput le ziaza ah Bawi Zisuh nun ka hmuh i Khrihfa ah lut loin ka um thiam lo i ka lut tiah a leh hna. Phundang in kan chim ahcun David nun le ziaza ah Bawi Zisuh ka hmuhmi nih ka nunnak ah rian a ttuan i ka um thiam lo, mah ruangah Khrihfa ah ka luhnak a si tiah a leh hna. Nang le kei Khrihfa nun ahhin teh Bawi Zisuh muisam le nun, midang nih teh an hmu kho ve hnga maw? Kaa le nunnak in hehtiah zum lotu hna sinah missionary cu kum tampi kan ttuan len ve ko nan mi pakhat hmanh Khrihfa ah kan cangter kho hna lo/kan luhter kho hna lo. Nitin kan Khrihfa nunnak ah midang nih kan biakmi, a nungmi Pathian an hmu kho ve hnga maw?

(2)Tidim pa, ralkap bawi (captain) nih Kawl Buddhist nu a tthit ti si. Mah Tidim ralbawi pa hi Khrihfa tthatuk a si ti si. Mi nunnem, mi tthate a si. An nu cu Khrihfa a si lo nan voikhat hmanh Khrihfa kong le Bawi Zisuh kong cu a chim bello i Khrihfa luh zong a sawm fawn lo ti si. Nan kum zeimaw zat a rauh hnuah an nu cu Khrihfa biaknak ah a lut ve. Interview an tuah i zei ruangah dah Khrihfa ah na lut tiah an hal. A lehmi hna cu kan pa nih voikhat hmanh Bawi Zisuh kong le a biaknak kong Khrihfa kong zong a ka chim bello nan kan pa nunnak, ziaza le lungput ahhin Bawi Zisuh nun le ziaza ka hmuh i ka um thiam lo i cuti cun Khrihfa i ka luhnak a si e a ti. Tidim ralbawi pa hi Pathian tehte ttha a si i Khrihfa biaknak ttanh le sualnak lawng doh i auphun a si lo. A nunnak in Khrihfa cawnpiaknak le a sullam cu a langhter. Cuticun an nu cu a nunnak tiang a thleng khawh. Khrihfa tampi cu sualnak cu hehtiah kan doh i kan au len nan mi pakhat nunnak zong kan thleng kho ve lo i Pathian tehte ttha zong kan si kho fawn lo. Khrihfa biaknak cu a ttanhte lawng ttanh in kan i za ko.

Kan Khrihfa nun le lungput in midang nun thlengkhawh ding caan a za cang. Kan nun ziaza le thilttha kan tuahmi in zum lotu pawl cu Bawi Zisuh hnu zultu ttha ah ser ve cang hna u sih. Credit-Van Tum

Be the first to comment

Leave a Reply

Your email address will not be published.


*