Kan innchungkhar sersiam ṭhan kan herh!

Lenglei muisam pumrua le idawhnak hi innchungkhar caah biapi asi lo. Pakpalawng asi.

Rawlulh in thlacam mi nu/pa, Bible rel a duhmi nu/pa, innchungkhar ah Bawipa thangṭhatmi nu/pa, Thiang Thlarau a comi nu/pa, a taksa duhnak mahlemah aa uk khomi nu/pa hna le zumhawktlakmi nu/pa hna hi innchungkhar sernak caah abiapitukmi an si.

Innchungkhar a sermi hna khi “kan duh tuk! Kan dawt tuk! Nangmah kan duh bik!” tiah aa timi lawngte an si.

Cu lawng si loin Pathian hmai le minung hmai ah sathi luanh in biakamnak “thih tiang” a tuahmi lawngte an si.

Asinain Jesuh Khrih nih an nun a uk hna lo caah, Thiang Thlarau ṭhawnnak an co lo caah, an taksa duhnak cu diriam i, an rim pakhat le pakhat an icelh ti lo caah siknak, buainak, bia ielnak, itheihthiamlonak, iduhdawtnak a zor, cun nu/pa dang cungah thinlung dang ngeihnak, iṭhennak tibantuk nih a phak ṭhan hna.

Patung cheukhat nih an nupi rim an duh ti lo caah diriamnak kawl in video ṭhalomi, porn zohin diriamnak an kawl. Nupi cheukhat nih tlangval dang cungah an thinlung le taksa duhnak a zuang. Kan taksa duhnak a zor hnucun kan biakamnak zei ah kan rel ti lo.

Bawipa kan ṭih ti lo. Bawipa nih a kan fonhmi asi kha biapi ah kan chia ti lo. Kan biakam zei ah kan rel ti lo.

Taksa duhnak nih kan pumpaak nun, nuleva karlak ipehtlaihnak le kan innchungkhar fale hna cungah Satan nih a pen cuahmah.

Cucu mahtein taksa duhnak, thinhunnak, damlonak, zawtfahnak, lungretheihnak chung in a chuah kho ti lomi, bawmh herhmi kan Chinmi innchungkhar le kan Khrihfabu chungah tampi an um.

Pastors te nih an bawm kho hna lo. An chanchuah kho ti hna lo. An luatter kho ti hna lo. Training menmen, crusade menmen, revival tuahnak menmen le Sunday sermon menmen nih a damh kho hna lo. Thiang Thlarau rianṭuannak lawnglawng in damh khawhmi asi.

Cucaah nuleva taksa in kan iduhdawtnak cungah kan thinlung hi Thiang Thlarau nih sersiam biapituk asi. Nuleva hmunkhatte ah thla kan cam ṭi lengmang ding asi.

Bawipa sermi athianghlim tukmi innchungkhar asi. Kan nuva tein Thiang Thlarau co veve usih!Credit-James Vanneilian

Be the first to comment

Leave a Reply

Your email address will not be published.


*