Kalaymyo ralkap uknak duh lo lamzawh minung 6 meithal hliam tuar

March 2 Kalaymyo ah ralkap uknak duh lo lamzawh mi minung 6 nih meithal hliam an tuar, tiah kan theih.

Hi he pehtlai in lamzawh ah aa tel ve mi Pu Heng Cin nih “Lamzawh ah hin kaa tel ve. A lai deuh ah ka um. Palek pawl le kan hmaikal pawl an van i ting. Mitthli tlak bomb a hung puak. Cu vial ah lam zawh mi kan naule zeimaw zat hna cu buaipi an si. Ka um ve ko nain khoika in kuan hi a rat ti hi a ruah awk ka thei lo.

Lampawng inn cung in a si rua an ti i an va kal nain a si lo an ti. Inn pakhat in a silai an ti, cu inn cu innka an hrenh. Khoika in a si hngalh lo in kan naule minung paruk nih meithal hma an pu ko,” tiah The HaKha times ah a chim.

March 2 lamzawh pawl hi chaklei in a zuangmi le thlanglei in chaklei ah a kai mi phu tiin an si. Hliamhma a tuar mi hi thlanglei in a rak kaimi pawl an si.

Hliam tuar mi 6 ah hin Chin pa Vaal Joseph Thang aa tel ve. Anih hi a kephah ah kuan nih a khen i kuan a tang an ti. Midang pa 5 hna lakah pakhat cu a paw ah kah a si i a ril a chuak i Mandalay ah kalpi ding in Royal Hospital siibawi nih a ti an ti.

Hliamhma tuar dang minung 1 cu, a taang orhlei in a hnulei ah a vawr i, oxygen pek cuahmah a si ve an ti. A dang minung 3 hna hi an ke ah hliam an tuar cio tiah, kan theih.
Credit-The Hakha Times

Be the first to comment

Leave a Reply

Your email address will not be published.


*