Kalaymyo khua pakhat ah Dalan an thah hnu ah a inn mei an khangh

Kalaymyo ,Natchawng khua ah ni zan (May 23) zaan suimilam 9:00 hrawng ah Dalan pakhat cu meithal in an kah hnu ah a um nak inn mei an khangh tiah theih asi.24May,2021 Zalen

Tei le Sungh Minung kan nunnak ah biapi ngai in kan chiah ciomi cu teinak hmuh le sunghnak ton hi a si. Aho hmanh nih sungh hi kan duh lo. Asinain kan ralpa Satan nih sunghnak kha angki phundang a hruk ter i teinak muisam a cuan ter i cu ti cun ni fatin sungh zatlak puicimhnak chungah luhpi a kan timh peng. Rak i ralrin ngaingai lo ahcun a langpar in cuanh tik ah facang kung le belh kung kha lo chung ah an kheu tti i thleidan awk a har ngaimi a si. Lamphawk (short-cut) in teinak hmuh zong kha minung nih teinak le rumnak a si paoh paoh ahcun a chiattha thleidannak lungthin kha a hun chiakta duak i thihnak lamphawkpi cu a zulh luaimai tawn ko.

Abiana ah India ram ahhin sii phunkhat an chuahmi a um i cucu zalong tein cawk khawh a si; cu sii lila cu rit-sii caah hmual ngeimi in sersiam khawh a si caah Kawlram in Tuluk ram ah lamphawk in luhpi a si, phaisa lei ah rianrang tuk in rum khawh a si; chikkhat te cu Aizawl, Tahan, Falam, Hakha, le khua dangdang hna cu rumnak lei ah a muisam a hun thlen colh ko nain, teinak taktak cu a si lo ti cu zapi nih kan hngalh mi a si ko. Kha bantuk rit-sii lila kha atu lio ral-lo-kap pawl nih hriam ttha ah an i hman i mi tampi an kan hrawh i tlaihhremnak ah an hman ngai mi sii a hung si i vawlei cung ah sungh ningzahnak nganpi a chuah pi ko.

Bawi Jesuh kha Judas Iskariot nih phaisa 30 ah a zuar khawh ruangah an tlaih khawh mi a si theng rua lo. “Ahodah nan kawl?” tiah Jesuh nih a hal lio hna ah “Nazareth khuami Jesuh,” tiah an leh. “Keimah hi ka si” tiah zaang dam te le ttih lo te in (simple dignity) in a chimh tik hna ah ralkap pawl kha vawlei ah an tlu, an tawng ngam naisai lo. Pathian duhnak tlin ter awk ah kan Bawipa Jesuh nih “Nganfahnak hrai” kha a rak din ko, an zuar khawh ruangah a si lo. Vawlei sualnak a kalpi tu Pathian Tuufa cu Judas le ralkap hna nih, kha dum chung ah khan chikkhat cu an tei mi a lo nain an tei naisai lo. Nihin ni ah kan thinlung chungah kan Bawipa Jesuh Khrih a sung bal lo, Satan nih a tei kho bal lo.

Atu lio har kan ton mi ahhin Judas bang in a bawipa hnamhnak in a rawiphiar mi (dalan) kan lak ah an um ve ko lai. Asinain dawtnak le daihnak taktak hmai ahcun hrawh aa tim mi hna kha vawlei ah an tlu ve ko ti kha philh lo ding a si. Tluk ciocio ah hin dawtnak le upatnak aa tel lo mi tluknak cu ralkap pawl Jesuh hmai i an tluk an ttih bantuk ceo kha a si ko, nun a thleng lo. Asinain Damaskas khua lei i khrihfami hrem ah a kalmi pa Saul (a hnu ah Paul ti in a min aa thleng) kha ceunak hmai ah a tlu ve, asinain anih cu a nun aa thleng, Khrih dawtnak nawlbia phurtu pa ah aa chuah.

Kan laitlai unau Mindat khuami hna cu vawlei mit in cun, chikkhat hnu an tawlhnak kha sungh ah kan ruah sual men ko lai, sihmanhsehlaw daihnak kong Kawlram nih a ttial tik ah philh awk ttha lo in lungthin ram ah teinak tuanbia ngeitu an si ko cang. US hmanh nih a thinlung catlap ah a ttial cang! Kan lak ah tuu-phaw i hruk in cinghngia a rak si ziar mi sahrang an um len ve ko lai, vawlei a teitu Khrih i zohchihnak in cu ral cu kan tei awk a si (cf. Heb. 12:1-2), nunnak ahhin teinak taktak kha Khrih chungah a um zia hi thukpi in ruat peng hna usih law i hnangam pi ko hna usih. Lamphawk in teinak le rumnak hmuh khawh hi tuu-phaw aa hruk mi cinghngia a si kha philh hna hlah usih. Lam, biatak le nunnak taktak cu Jesuh Khrih a si i teinak zong a si fawn.Credit-Lal Pek Lian

Be the first to comment

Leave a Reply

Your email address will not be published.


*