Kalay MP a rak si mi Pi Siami a upa Dr Zachhinga hi mihlai tu siibawipi a ttuan lio mi si i a riantuannak lei hmun akal lioah meithal kah atong

Kalay MP a rak si mi Pi Siami a upa Dr Zachhinga hi mihlai tu siibawipi a ttuan lio mi si i a riantuannak lei hmun akal lioah meithal  kah atong i a orhlei mit apawt ti si.

A nih hi CDM a rak tuah bal nain ralhrang nih pohmah 505 in taza an rak cuai timh caah April thla ahkhan a rian ah a lut tthan tiah theih asi.

Tuhi Naypyidaw siizung pi ah an thlopbul lio si tiah theih a si.Tuhi a zualhma ngai tiah theih a si.Credit-Wiliam HC

June thla asiloah sianginn kai tawn nicaan kan phan cang lai nain…(1) Kan dihlak in CDM tuahți rih usih!By_Mai: Thantlang in CDM Siangcachim Sayama pakhat

Voidang keel bang atu tik cu sianginn i ap caan le siangngakchia nulepa hna nih fale duhherh an zalhpiak hna caan a si.

Nikum in COVID-19 zawtnak ruang ah a kum thluan in sianginn kai khawh lo a hung si. Nulepa he siangcachim he fale caah lungretheih in kan rak um hna. Tukum cu fimnak hnukthlum kan ding kho cang lai tiin fale le nulepa hna nih kan i hngahhlang tuk lio ah ralhraang ruang ah kan ram ah buainak a chuak. Kan chunmang dihlak an fir.

Kan ram ah CDM a tuah mi siangcachim cheukhat hna cu tlaih khih an tong. Tlaih ding ah dawi an si. Micheu caah nun a him lo. Rian phuah an tong. Hmailei zeitindah kan nun kan peh lai ti fiang loin harsatnak phunza an tuar. Zaan ih hmanh merem thiam loin mitthli he thinphan thlalaunak nih a kan khuh hna.

Nifatin ei ding tirawl ah lungrethei in kan um. Cu a har tuk mi khuallam cu dinnak hmuh duh ah kan i thim. Kan tlaihchan mi kan rian, pawcawmnak ca ah thim mi kan rian cu dinnak hmuh duh ah kan kaltak. Sianginn ah kan cawnpiak tawn mi hna cu, “Fimnak sang bik na ngeih zong ah na nun ah dinfelnak le zawnruahnak na ngeih lo ahcun na fimnak cu țhathnemnak a ngeilo,” tiin kan i cawnpiaknak a si tawn. Cu kan i cawnpiak mi bia cu atu ah a harsa mi lam thim in kan tuah.

Nulepa hna nih kan fale cung ah kan siangcachim hna nih dawtnak an ngei lo. Fimnak cu an chimh hna awk a si tiin ruat hram hna hlah usih. Nulepa hna nih kan fale cu dinnaklei ah na țang lai tiin kan cawnpiak tawn hna bantuk in kan ram caah dinnak țanhpi hna usih. Dinnak lam cu thim in muihnak cu kan fale he caan chikkhat chung pahți rih ko hna usih.

Lawmhnak he a khat mi ceunak nithar kan phak tiang harsatnak cu kan dihlak in lungsau tein pahți rih ko hna usih. Teinak ni kan phak hlan tiang nulepa, siangcachim le siangngakchia hna nih lungrual tein CDM tuahți rih ko hna usih.

Kan dihlak kan lung aa rual peng ahcun TEINAK cu kanmah ta a si.Biakilh: Siangcachim, Siangakchia le Nulepa cheukhat nih sianginn an ngaihnak, sianginn kai an duhnak le fale fimcawnter an duh tuk ko nain kai awk tha a si lonak pawl kha atu bantuk in cheukhat nih The Hakha Times ah an langhter i pakhat hnu pakhat (1, 2, 3,…etc) in kan hun langhter hna lai.

Hi kong he pehtlai in cabia (article) zong in tial ve a duh mi nih The Hakha Times messenger (cb) ah kuat khawh a si.The Hakha Times

Be the first to comment

Leave a Reply

Your email address will not be published.


*