Kalay Khaikam Gate in Laitlang kai ding motor ah COVID mizaw pahnih hmuh

Tuzanlei November 3 ah Kalay Khaikam Gate i Laitlang kai ding motor an check mi ah driver pahnih sin in COVID-19 zawtnak an hmuh.

“Laitlang lei ah a kai ding thilphur motor an check mi hna chung in motor driver pahnih cu COVID zawtnak an hmuh hna ca ah Tedim sii-inn ah an chiah hna,” tiah Falam Sii-inn Uk Dr. Tluang Cung Thang nih November 3 zaan ah The Hakha Times ah a chim.

Zawtnak an hmuh mi hna pahnih hi pakhat cu Falam khuasa kum 26 a si i pakhat cu Thantlang khuasa kum 21 a si. An pahnih in Kalay ah zan khat veve an riak. Kum 21 pa hi Taungphila 1/9 ah zan a riak. Kum 26 pa hi Kaci wai hrawng ah a riak. An pahnih in Laitlang lei kaipi ding ar a phurtu motor driver an si. An pahnih in zawtnak an ngeih hnu ah mi tampah he i pehtlaihnak ngeih dawh an si tiah theih a si.

Kum 21 a si mi Thantlang pa hi, Thantlang sianginn sang um mi a si. A umkalnak theih tawk ah October 28 ah Kalay in Thantlang a rak phan. November 1 ah Kalay ah a kir than. Thantlang a um lio ah Market ah ar pek ah a kal i Yaw Kha Yee kunza dawr ah Ocotober 30 ah kunza a caw. Cun Kalay a kal zing ah sianginn sang Gospel Biakinn pawng hrawng ah a kal tiah theih a si.

Khaikam gate in cheknak kong ah Dr. Tluang Cung Thang nih “Cu hlan zong hika gate ah hin Laitlang lei kai ding motor check peng a si ko nain cu hlan cu an hmu lo, tutan hi ruah lopi in pahnih hmuh an si ca ah ralrin ngai kan hau,” tiah Dr. Tluang Cung Thang nih a chimchap.

Hi mizaw pa pahnih hna cu zawtnak an hmuh hna tiang ah zawtnak a langhnak a si mi zawfak phun cun an um lo tiah theih a si.Hi bantuk in nizan November 2 zong ah Mizoram in a ra mi nu pakhat kum 28 zong Rih Gate ah zawtnak an hmuh tiah a cunglei upa sin in kan theih.

Hi zawtnak an cheknak seh phun hi suimilaam cheu chung ah a phi a lang mi seh phun in chek a si ca ah riantuantu ca lawng si lo in mizaw le zapi ca zong rian a fawiter deuh ngai cang tiah riantuantu sin in kan theih.Credit-The Hakha Times

Be the first to comment

Leave a Reply

Your email address will not be published.


*