Ka Ning A Zak Ngaite

Zahan cu ruah fak ngai ai chai. Thuthlurh in kai hngilh. Deika ah kai ṭhang nain mei a mit. Ruah le a tuk i ih a nuam ai tiah ih kai chap. Zing 9:00 AM ah kai ṭhang.

Kai ṭhanghka hrawng ahkhin innka ai king. Rulrel ka tho i kutka ka fuh. Kutka ka hun tikah kan inntang ngaknu a si. A kut ah kheng le arti ai put. “Easter Eggs kan ṭhen hna” a ti. Nihin cu Easter Sunday a si maw aih ka ti. “Si ee. Easter Sunday a si hi” a ti. Khua ka ruat i ‘vik’ tiah ka lau.

Maw ka nu te. Thawhṭhan ka philh. Lohtlau taktak. Lawmhbia ka chim le chim lo zong ka thei tilo. A ṭin hnu ah innpi cabuai cung ah Easter Eggs cu ka chiah i sau nawnte ka zoh. Ka ning a zak ngaite. Ngaknu hmai zong ka khap lo (Buddhist a si). Arti hmai zong ka khap lo. A reng ah; Bawipa Jesuh hmai zong ka khap lo.

Nihin hi Khrihfa mi hna nih kan sunhsak mi Bawipa Thawhṭhan Ni a si. Kan ram buainak a fah tuk ruangah thawhṭhan hna hi kan philh thulh. Voidang a lawh lo ning a fak khun. Easter Sunday Eggs Strike “Thawhṭhan Ni Ralkap Duhlo Langhternak” ca ah arti kha an chumh i dawh tein an ṭamh. Biaknak nipi a si ca ah ṭhatnak an tuah. Mi dang biaknak kan upat ko ti kha an langhter. Cucu tutan Burma Spring nih a chuah pi mi midang nunphung, biaknak upat piaknak le dengteo in ralkap uknak dohṭi ding lungrualnak kha kan hmuh khawh. A lawmh zong kai lawm. Ka ning zong a zak.
Bawipa thawhṭhan daihnak le lawmhnak nan cungah um cio ko seh.Credit-Salai Lengkawite

Be the first to comment

Leave a Reply

Your email address will not be published.


*