Ka kawl lengmang nain ka hmu kho lo.

Khoika ah dah na um?” tiah ka thadih umnak in ka au lengmang i a donghnak ah ka hmuh. Asinain, ka sin ah a ra duh lo. A ka hmuh i amah ka kawl lengmang zong a hngalh ko nain, ka sin ah a ra duh hrimhrim lo. A nawl in ka nawl; a phunphun in ka leem. Nain zei ah a rel lo. “Keimah tein ka um kho ko; nangmah kaan herh lo; a um zong kan um ți kho lai lo” a ka ti.

A si le zei ti awk dah țha, ka ti i ka thlahthlam. A duh poh in va um lawlaw kun seh, ka ti. Nain, a donghnak ah cun ka thlahthlamnak nih ka nunnak a hnawrsuan; a rianțuannak ka hmuh tik ah ka nunnak nih a celh lo. Ka zoh kho lo. Ka hmuh fatin ka thin a lin, ka khing a rit. I suum kaa zuam lengmang nain caan sau a nguh kho lo. Ka mit kaa chinh zong ah, ka thinlung mit ah a lang. Cu ruang ah, a donghnak ah cun faak ngai le biatak khun in khua ka ruah cikcek hnu ah, amah va ton țhan ding in biakhiahnak fek ka tuah cang. Ton sawhsawh hmanh si loin ton ciammam in ton ding in biakhiahnak ka tuah cang.

Cu ka va ton ding mi cu ”DINLONAK” a si.
Keimah nih maw ka tei lai? Amah nih dah a ka tei lai? Ahohmanh nih chim chung awk a țha lo. Nain, a fiang mi pakhat cu DINLONAK cu teinak a hmuh zong ah a dongh ning cu DINLONAK in a si ko lai. Cucaah, ka sungh zong ah kaa lungsi țhiamțhiam ko lai.
Credit-Peter Hrang Lian Thang

Be the first to comment

Leave a Reply

Your email address will not be published.


*