Ka hngakchiat tuk lioah ka pa cu raltuknak ah a thi. Ka pu nih a pensen sok a duh lo.

Atlamtlingmi Pathian Caan Tuaknak ( God’s Perfect Timing)Zumtu nunah kan i harh ngaimi cu Pathian khiahpiakmi caan hngah hi asi. Minung cu kan duhmi le kan i tinhmi tling zawzok seh ti kan duh. Sihmanh sehlaw Pathian cu a rak si lo, Peter nih a chim bang Bawipa cu a biakam tlin ter awkah a khul a nuar ko tiin micheu nih cun kan ruah ko ( 2Pet 3:9). Asinain Baibal kan zoh tikah Pathian caan tuakning cu kanmah tuak- ning he a rak i khat lo ti kan hmuh. Mah kong zong hi theihtlei asi ve.

Rul sinah,” Na tefa le a tefa zong ral an si lai. Nang nih a kedil na khuai lai i, Annih nih na luu an khuai lai,” tiah a rak timi kha Jesuh Khrih vailam cung i a thihnak thawng in a tlam a tlingmi mi asi. Kum 4000 renglo deuh hnu ceu ah a tling kan ti khawh.

Josef nih thonginn in a chuah i a unau le he an i ton thannak dingah kum 13 a rak hngah khah Israelmi nih Iziptram in an chuahnak dingah kum 400 reng lo an hngah ve.Moses nih Isrselmi Iziptram in a chuahpi hna nak lai rai phunhra ai lim tiang a rak hngah.

Joshua le Kaleb zong nih Kananram luhnak dingah kum 40 dengmang an rak hngah ko. David nih siangpahrang luchin ai chinhnak dingah saulakte har ngai in a rak hngah ve. Mary le Marrha sinah Jesuh nih an cah le cangka a kal lo. Nili hnu ceuah ava kal i an ta Lazaruh kha thihnak in a thawhter.

Pathian cu kanmah duhning in ai hnamhnaw tawn lo. Amah caan tuakning tein a cawlcang ko. Zeitik caan paoh ah Amah tuak piakmi hi a tha deuh i a hman deuh zungzal. Sam 70 hi kan rel tikah David zong nih caan kongah a rak i hnamhnaw ngai ve ti kan hmuh. Vawi thum thliahmah Bawipa kha i hnaw, asilo le, i ranh tiah a nawl ( Sam 70:1,5). Kan Lai Baibal ah a telh lo, Mirang le Kawlah rel hmanh. I hnaw ti in vawi thum ati hnu ah a donghlei ah cun, ” rau sawh hlah,” tiah ati,Sam 70:5 ( Do not delay).

Ka hngakchiat tuk lioah ka pa cu raltuknak ah a thi. Ka pu nih a pensen sok a duh lo. Ka nu cu ano tuk rih caah va dang a ngei i sok arak ngah lo. Cucaah ka pi min in an rak sok. A hmu lo. Tangli ka on hlanah voi hnih keimah min in vuanthok zungah an ka kalpi i ka sok. Ka hmu hlei lo. Kan lung a dong cang. Tang hlei thum ka cawn lio ah Hakha patizung lutlai Pu Tum Khar nih vuanthokbawi Pu Run Ro Thang aka chimh piak i an ka sok piak. Mah hnu ceu cun kum 18 ca kha a ningpin ralkap pensen zung nih an ka thoh. Mah phaisa cun pei college kum linak ka cawng kho i kai lim cu. Pathian nih ka herh cem te ding caan kha a rak tuak diam cang.

Kan Pa tuak piakmi caan hi a tha cem. I hnaw tuk hlah usih. Ram le miphun ai thlen ding caan zong Pathian nih a tuaktan ko. A caan a phak cun a tlamtling te ko lai. David bia in donghter usih. ” Ka caan cu na kut chungah a um dih,” ( Sam 31:15). Nihin cu zarhpini asi le tuan deuh, pumh hlan i rel manh dingah ka van post ko hih. Na sia-herhmi an um le SHARE ve hna.

Pathian tuaktanmi caan kan hngah thiamnak lai kan zate Thlarau nih kan hruai seh. Amen!By- Thawng Cinmang Rev. Dr. Gordon Za Thio

Be the first to comment

Leave a Reply

Your email address will not be published.


*