Ka fanu thihnak in a thawhter thantu kan Pa Sertu Pathian kan i lawm Tuk

Ka fanu Annie Biak Tha Par hi kum (5) tlin lai hi aa ngaih tuk.Cucaah lockdown lio si ko nain a hawikom donghnih he birthday party cu bite in inn ah kan tuah piak.Hi hnu hmailei kum 100 birthday tiang zong phakter ko tiah thla ka cam piak.A birthday in zarh (1) tlin hlah ah a upa he voikhat ah an zaw ti.An tak linh an dai kho lo.Ka fanu cu a chung nih tlik pah caah i hngilh lo tein khua kan dei.
Zingka teah a nu nih zahan ka mang ah hor thuk pi ahkhin tla ding phun kan va si i keimah le ka fapa cu nangmah nih na kan kham manh.Ka fanu Annie tu cu na tlai deuh cang i nai te i covid in a thi mi ka hawi doctor nu nih a rak chanh. Mangtha maw mangchia dah si ka thei lo a ka ti.Ka let lo.Ka lung chung tein cu bantuk mang hna cu na kaa chung in na chuahter tiah ka hei ti.

Cu ni zanlei sang cu an pahnih tein an hmai panh deuh ngai kan ti lio ah ka fanu hi ruahlo tukin a vun zual.A nu nih sii chunh awk va caw zawk a ka ti.Sii dawr pakhat hnu pakhat nih kan ngei lo an ti.Sii ka cawk khawh i kan inn tang ka phak bakah a nu nih puantom he a kut in a cawi i inn tangin a rak ka hngah cang.Mata hospital ah kan kal pi zawk a ka ti.

Mata i emergency room kan phak zongah a therh dai lo.Fever zong temp 105 tang a tum  kho hlei lo.Vai pawl  an khul cu chungkuh nakin nuar deuh kaw an zoh sawh rih ko.A nu nih sii kan cawkter mi kha chuah law a ka ti i Nurse nu kha chun zawk a ti.Tlawmpal ah a mit au dan a vun i dang thluahmah. A taksa zong a duk i a dang bantuk si cang.A kaa ai an i vai doctor nu nih Annie tiah a kawh.A let ti lo.Ka tuar ti lo i Annie tiah a hnakhaw pawng in a ka auh. A ka let ve ti lo.A nu nih inn in kan chuah lai teah ka fa thlacam mu.Bawipa nih an damter lai tiah ka ti i ka nu, a ka dam ter ti lo hi tiah amah hmurka hrim in a chim cang cu a ti i,a nu zong a mitthli he ngur ngur tiah a tap.Ka fanu cu Annie tiah ka auh pah in a biangnem teah ka fanu kan dawt tuk mu tiah thennak bia bantuk ka chim cang.

A nu nih counter ah rannak in admission tuah dingah a ka fial.Counter thumi nu bia a ka hal mi ka thei tawn lo zei ee ka ti lengmang.Cu lio ka ruah mi cu kan nu nih a rannak in sii a ka cawkter lio ahkhan zeiruang dah ka scooty lampi ah a rawh lengmang.Ni dang hi bantukin a um bal tung lo.Kan nu a mang hi a takin ka fanu cungah a tlung tak cang ko lo maw?Chikhat te cu khuaruah awk zong ka thei lo.Counter nu cu zeidang bia ka hal ti hlah law..Atu dam lo hi Dr.Pari nan hospital i a rak tuanmi fanu kha a si.Ca ka chuah piak law herhmi cu hnu ah tlamtlinter kaa zuam lai ka ti.

Cu hnu ah ka fanu an chiahnak ICU lei ah ka tli colh.Ka kal pah in “Bawipa..mang hi ka zum lo.Nangmah tu kan bochan” tiah thla ka cam pah.ICU room ahcun ka lut i ngakchia doctor cu a panh lo mithmai a kengmi ka lawhter.Cutikah “Bawipa, ka fanu cungah na mithmai ceu tlanter law harnak a petu a muimi thawnnak vialte cu na ceunak nih pawnchuah dih ko” tiah a thli tein thla ka cam.Ka mitthli a ha.A nu nih a ka hmuh sual ahcun tiah ral ka ven pah.

Emergency in kan rat caah thil pakhat hmanh kan i ken lo.A upa ngakchia Nathan te lawng inn ah kan kal tak fawn.ICU ah sau thut ti loin inn ah thilri lakah ka kal.Inn ka phak bakin ka fapa te he vampang ah kuthler in thla kan cam.Cuhnu ah thilri sanhnak caah park ah ka bei tawnmi bag cu ka lak. A sir lei a zal ahhin ka fanu he park kan rak kal lio i ka fanu nih pangpar hnahno a rak tawh i a rak sanhmi pangpar hnahcar te ka hmuh cu ka lunghno than.Ka fapa lente aa celhnak tuang ka fim ka ti cu, ka fanu nih “kanu,kum(5) ka tling cang i tuang thianh kan bawmh lai a timi aw ka hnatlam ah a cuang than.

Ka fanu..kan inn chung ka hmuhmi thil vialte nih nangmah lawngte an in hlam.Kan liam tak sual law zei hi dah thlan ah kan rawnh lai i zei hi dah nangmah philhlo nak ah kaa chiah hnga? Nunu le Papa wedding lio tiah nangmah idea tein na suaimi zuk cu ka siang lo. Kaa chiah ko lai mu ka ti pah in thil cu ka sanh hna i siizung ah ka kal than.

Atu cu ka fanu..Bawipa nih thihnak in an thawhter than cang. Ni 9-10 te lawng na um cang lai.Inn ka lawi i ka phak cang ka Papa ka ngai na timi cu na mawh lo.Thla(3) na tlin in Papa keng cungah na thang i midang zong nih “Annie,Papa keng cu nangmah na park a si ko” an in ti tawn kha.Inn kan lawi in Bawipa kan cungah a thatnak cu kan zapi tein kan chimti colh cang hna lai.

A kan sertu le a kan daw bik tu Pa Pathian, Ka fanu Annie Biak Tha Par thihnak in na thawhter than caah kan chungkhar dih lakin na sinah lawmhnak bia kan chim.Kan cungah na thatnak le na dawt cu kan nunnak ah kan chanchung a camcin cang lai.Na sunparnak cu na kan hrawmh i damnak kan hmuh caah na Min kan in thangthat. Credit-Salai Tin Maung Win

Be the first to comment

Leave a Reply

Your email address will not be published.


*