Judas Iscariot bantuk Dalan kan tam ko

DALAN…DALAN…DALAN… kan I Dalan dih ko hna hi aw. A Dalan lo te kan um hna lo. Dalan fa deuh le Dalan ngandeuh lawng in kan um hna I si. Ralkap nih Feb. 1 in uknak an lak hnu cun Dalan biafang cu a hung lar ngai. A tak te cun Kum 1962 lio le mah hlan vialte, le kum 1988 lio in kum 2020 tiang zongah Dalan cu rak um peng a si ko. Khrihfa mi tuanbia zoh tik ah Dalan nganbik le ttihnung bik cu Judas Iscariot hi a si ko lai ka ti. Cucaah cun midang caah tthat lonak a phun2 tuahnak ah mizuar hmang le mileirawi hmang na si ve ahcun Judas Iscariot bantuk na si ve tinak a si ko lai. Ralkap uknak lak lawng in Dalan rian hi a um lo. Laimi Khrihfa lak zongah Dalan rian a ttuanmi kan um peng ko hna.

Miphun ning in Dalan rianttuan, khua le tlang ning in Dalan rianttuan, chungkhar ning in Dalan rianttuan, Khrihfa buu ning in Dalan rianttuan, PhD zong Dalan rianttuan, nungak le tlangval zong Dalan rianttuan, a rum le sifak zong in Dalan rianttuan, cathiam le thiam lo zong in Dalan rianttuan, muidawh le muichia zong in Dalan rianttuan, a lar le lar lo zong in Dalan rianttuan, piangthar le thar lo zong in Dalan rianttuan, Pastor le evangelist le Khrihfa upa tiang zong in Dalan rianttuan, kan za tein Dalan rian kan ttuan dih ko hna. Midang caah Dalan na si le silo cu na thiltuahmi le na nunnak kha rak I check ve law na fiang ko lai. Dalan rian ka ttuan bel bak lo na ti ahcun na palh bak lai. A tlangpi in zoh ahcun Dalan rianttuan hi a ttha bak lo, a bik in Khrihfa cawnpiaknak lei in kan zoh ahcun.

Keizong ka nunnak le thil ka tuahmi cungah Dalan pawl rianttuannak tampi ka ton ve. Dalan pawl nih khoika ka kal le zei ka tuah timi vialte theih an I zuam I hehtiah an ka dawi peng ve. A phunphun in harnak an ka pek. Asinan keicu mah Dalan pawl kut in luatnak ding le himnak hmuh dingah hehtiah Pathian sinah thla ka cam/bawmhnak ka hal. Ka cung I Dalan rian a ttuanmi hi an tamtuk ve ko. Nan Bawipa kan lei I a ttan ahcun aho Dalan nih dah an kan tei khawh lai mu.

Mi cheukhat cu kanmah lawng Dalan rianttuan kan I za lo I midang zong hehtiah Dalan rianttuan cu kan cawnpiak hna I kan sawm rih hna. Dalan rianttuan piak ding in midang zong phaisa le thilri kan phalh rih hna. Dalan rian ka ttuanpiak law tiah kan fial rih hna. Kan Bawipa Jesuh leirawitu le zuartu, Judas Iscariot zong Farasi upa le tlangbawi pawl nih Dalan rian ttuanpiak ding an fial ve I ngun tangka 30 zong an phalh ve. Asinan Judas Iscariot nih a Dalan rianttuanmi cu zeitluk in dah ttih a nung ti a theih ve lo tikah thihnak tiang a tonnak a si. Dalan rianttuan na palh ve ahcun nangmah ca lawng siloin na chungkhar le na rualchan vialte nih harnak le sunghnak a phun2 an ton ve lai. Curuang ahcun Dalan rian na ttuan tikah ttha tein I tuak hmaisa law a cung I Dalan rian na ttuan dingmi pa/nu sining zong ttha tein na hlat ta a hau lai. Mittha tukmi le mifel tukmi le miding mi cungah Dalan rian na ttuan sual ahcun Judas Iscariot bantuk in sunghnak tampi tuk na huah deuh lai/na tong deuh lai. Dalan rianttuan ruang i nunnak liam le suhgnak a phun2 tong lai cu na ruat kho lai maw?

Mi tampi nih Dalan rianttuan hi hlawknak le miaknak le thil ti khawh phun ah kan ruah tawn. Dalan ttuandan thiam deuh poah le fim deuh ah kan I ruat tawn. Khrihfa mit in zoh ahcun Dalan rianttuan hi sualnak nganpi tuah bantuk a si. Mah miaknak, hlawknak, midang nun rawhralnak le midang hnahchuahnak men ah Khrihfa mi nih cun Dalan rian hi kan ttuan awk hrimhrim a si lo. Dalan rian na ttuan chung poah cu Pathian he kan I hlat ti kha philh hlah.

Judas Iscariot bantuk Dalan nganpi, Laimi Khrihfa lak zongah kan tampi ve ko. Dalan rianttuan thiam I zuam ti hna hlah u sih tiah Bawi Khrih min in kan sawm hna. Midang ca thilttha tuah lawng I zuam hna u sih.Credit– Van Tum

Be the first to comment

Leave a Reply

Your email address will not be published.


*