Joyce Meyer hi Laimi zong nih nan theih pah dih cio lai dah ka zumh.

Joyce Meyer hi Laimi zong nih nan theih pah dih cio lai dah ka zumh. Vawlei cungah phungchim lei in a lar vemi a si. Pathian rian a ttuannak a kau tuk ve. Keizong a phungchim voi tamngai ka ngaih ve. Anih hi a muichia nan a zum ngai ve i mirum bantuk phun in um i thianghlim tein um a duh. A khualtlawngnak zongah amah pumpak vanlawng fate a nei. Dollar million 10 man leng a si.

A tuanbia ah a poi ngaimi le mi lung a tuaiter ngaimi cu a nungak no lio teah a pa nih voi 200 leng a tlaihhrem bel. Mah tik ah a pa cu a huat tuk i a pa a thih khawhnak ding tiang in hehtiah thla a cam i a nu le a pa an i tthen khawhnak ding zong in hehtiah thla a cam. A pa i a tlaihhrem lengmang cu a nu santlaih zong a si ve ti si. A pa a huatning cu a zual chin lengmang ve. Nan a pa cu a thih lai nawn ah a lung a thleng i amah Meyer nih tipilnak zong a pek. A tawinak in chim ahcun.

Meyer nih a chimmi chung in ka uar ngaimi cu ka nunnak i harnak le soiselnak le hnahnawhnak ka tongmi pawl hi keimah chung minung lila an rak si a ti. Mah hi ka ruat tik ah ka khuaruah a har tuk fawn a ti. Zeiruang ah dah mah thil hi a can ning a si hnga ti hi ka ruat a ti. Zeitin dah mah thil hi an tuah hnga ti hi ka khuaruah a har a ti.

Kan nunnak ah harnak, hnahnawhnak, soiselnak, tthat lonak, dohnak le hnahchuahnak ti bantuk a tuahtu pawl hi kanmah chung minung lila an rak si lengmang ko: kan hawittha, kan chungkhat, kan bu chung minung le kan pawngkam minung lengmang hi an rak si ko. Bawi Jesuh zong amah a zultu Judas Iscariot nih a zuar ve ko. Kan hawittha, kan chungkhat, kan minung lila, le kan pawngkam minung lila hi zuartu le leirawitu an rak si lengmang ko. Hi bantuk minung cu hrial khawh i zuam lengmang ding a si lai. Hi bantuk mileirawi a hmangmi nih cun mittha le mifel le miding zong an ruat lai lo/an hrial lai lo. Bible zong nih hi bantuk minung cu hrial ding tiah a kan cawnpiak. Hi bantuk minung pawl cu a chungah thlarau tthalo a lutmi deuh an si ko lai.Van Tum

Be the first to comment

Leave a Reply

Your email address will not be published.


*