International Women’s Day Hawidawt hna nihin cun vawleicung nu hna nih zatlangnun, riantuan nak le nunphung kongah an zalawn nak an lomh ni a si.

International Women’s Day Hawidawt hna nihin cun vawleicung nu hna nih zatlangnun, riantuan nak le nunphung kongah an zalawn nak an lomh ni a si. Hmanhsehlaw kan nih kawlram nu hna cu kan ramluatnak caah kan mitthli a luanni a si ve.

Nu le tampi cu kan ramluatnak caah tiin hmaisuangin lam an chuak i thlanti le mitthli he ka nunnak a dih kho ti an theih ko buin an nun an thap. Nu le tampi cu lam a chuak mi kan fa nau le hna dinei awkah an ti an ngeihchun ti le rawl tein nilin lak ah lam a zawhmi hna fanau le hna zawnruah ah rethei ngaiin dinei ding an timhtuah piak hna.

Nu le tampi cu ka fa le him le dam tein nihin inn an phan kho lai maw tiah lungrethei in an fa le inn hlam caan an hngak hna. Nu le tampi cu an dawt cukmak mi an fa le inn lawi ding an si ti lo caah an mitthli hnawh cawk lo he nun sivang in an um ve hna. Nupi le tampi hna cu inn a phan ti loding mi an va le kong an ruat i an mitthli hnawhcawk lo in an nunnak an hmang hna. Hmailei caanah dirkamh tu va le um lo in an fa le hna zeitin dah kan khuasak pi hna lai tiah thinlung kekkuai in ni caan a relmi zong tampi an um.

Nu le cheukhat hna cu an va le nih CDM an luh caah an nunnak a himnak hnga ramlak le hmundang, ramdang ah an zam tak hna i inn lo ngei lo in chungkhat sahlawh hmaikhap lo bu tein chungkhat sinah aa benh i mitthli he tonthan lainak caan sunglawi a hngakmi nu le tampi zong an um hna.

Ramdang ummi nu le tampi hna zong zei tindah ka miphun ka dirkamh khawh hna lai tiah an pumsa baa cikcek in over time tal kaa hnek lo ahcun a si kho lo tiah fahniang zawn hmanh ruat loin Laitlai kan u nau hna dirkamh khawh ve nak dingah heh tiah riantuan i hnek a si.

Dawtmi nu le hna, nantha chiacitcet hlah uh. Khua a mui camcin lai lo. Niceu dawh chuahnak ding caah khuamui chungah kan um ta a herh. Kan nunlam a muih cikcek lio zongah a kan hlaw lo i kan kutnem in lam a kan hmuhsak, a kan hruaitu Bawipa nih a kan tuarpi ko. Kan mitthli, kan lungkuainak le kan batnak a sawhsawh a si lai lo. Bawipa cu kan teinak a si.Bawipa nih him tein in veng cio ko hna seh.
By-Biak Tha Hnem

Be the first to comment

Leave a Reply

Your email address will not be published.


*