Iangtawi pa sin cakuat”Iangtawi pa (Pu Ṭial Ceu) cu Ralkap bawipa nih bia a rak hal.

Iangtawi pa sin cakuat”Iangtawi pa (Pu Ṭial Ceu) cu Ralkap bawipa nih bia a rak hal. Iangtawi pa nih a rak chim duh bak lo. Ralkap bawipa nih cun a thongh. A hnar thi hi a tlok. Ralkap kedenh he cun a chuih. Aa domh. A thin han celh lo ah teh a si ko lai, a kut ai sih le ralkap bawipa cu a va fuuk nolh. A hnu ahcun ralkap bawipa a lung dong le teh si lai, a ngol.”

Iangtawi pa, Ralkap kut na rak tuarnak kong kha khua ka um lio ah khan ka rak theih. Mah kong kha chim ṭhan duh lo tiang in na lung a fak ti zong ka theih. Na mawh hrim hrim lo.

Na kal hnu khan ralkap nih uknak hram hram in an laak ṭhan. An zia an ṭhin hlei lo. An kut in minung 800 leng an thi cang. Minung 3000 leng kai an tlaih hna. An hrem hna. Khuapi chung ah dai tein lam a zawhmi kha meithal in an kah hna. A thi he a nung he lam cung ah an rawt hna. Khua pi he khua te he an kut a tuarmi an tlawm ti lo. Mi inn an boh i tangka an fir. Thil an hrawh. An ziaza hi ram pumpi ralkap ti ding a pel te hmanh a um lo. Minung an si lo.

Asinain mu Iangtawi pa, tutan cu mizapi nih an lehrul ve cang hna. Kan tlang zong ah thisen a luang ve cang. A rak in thongtu le a rak in chuihtu ralkap bawipa bantuk ralbawi pakhat zong kan tlang vawlei ah a thi ve. Duhmi cu a si lo nain hrial awk a ṭha ti lo. Hi hnu cu Kawlram ralkap pawl kan khua kan ram chung an vah ṭhan sual zong ah an ning a hngal ngam ti lai lo, thinphan dai lo in an um ve cang lai.

Kawlram ralkap ruang ah kan tlang khua tam deuh cu ram tang ah an zam ve an ti. Senthang peng hrawng, Mindat le Kanpelet lei zong ram tang ah an zam ve hna. Mindat hoi hna cu raltuknak helicopter in an kah hna. Zei can a rauh lai ti zong theih a si lo. Mah khua le mah ram lila i ralzam si cu ngaih a chia i lung a fak ko. Amah bel, Laitlang ca ah cun thil thar a si nain Kachin le Karen kan unau hna nih cun kum caan sau tuk an rak tuar cang. Kan thilrit kan i chawng cang kan ti ko lai.

Iangtawi pa, a lang tlang in khua le ram na rak cuanh zawn ah khin na sia cu a herh ve ko lai mu.

Khua mi hna zong a herh cang ti ahcun khua na um lio bantuk te khan lung rual tein khua an khangṭi ko hna an ti.

Kan tlang zong ṭhanchonak lei ahcun hawi hnu ah kan i thlai ko nain dothlennak ahcun hawi sin te ah an kal cuahmah ve ko.

Hi dothlennak nih hin thazaang thar tampi a kan pek lai tiah ruahchannak ka ngei.

Khua mi hna nih an intuarmi vialte zong hi hmailei kan fale le kan naule nih ngaihchiatnak ah hman lo in lungrualnak ca ah an hman te lai.

Ralkap bawipa nih an thonghnak le an chuih an lamhnak kong an ruah ṭhan tik ah na thi le na hnai phen i na ralṭhatnak kha tam deuh in an hmuh lai i khua le ram kilvennak le ṭhanchonak ca ah thazaang thar laaknak ah an hman te lai.

Iangtawi pa, a tu ah hin na dawtmi na khua le na tlang mi hna sin ah hin bia chim kho law ngaihchiatnak le thachiatnak bia chim lo in lungṭhawnnak kong na chim lai tiah ka zumh.

Iangtawi pa, na sia cu a herh tuk ve ko lai nain siamrem lo cun rak um hlah mu. Na dawtmi Khualhringtlang zong hi dothlennak lam a dongh hin cun ṭhanchonak lam an zul ve cang lai!

A um har in a li maw leng sual lai kaw tiah na rak len i nihchuak capo he biatak he bia saupi na rak ruah tawnmi na nau,A Ruang 11/06/2021

Be the first to comment

Leave a Reply

Your email address will not be published.


*