Hi kong hi thutdeuh in khua kan ruah a herh ko rua. Myone kip le peng kip ah a herh ningin le a herh ruangah CDF dirh cio a si i a tha tuk. A herh tukmi a si.

Miphun hawi hna,A tu lio cu thil aa thlenning a rang taktak caah zei lam ah kan phan lai, zei lam hoih in kan kal lai timi hngalh khawh loin lung rethei in kan um cio ko. A tu Kawl ram pi nih kan tonmi le thil a rak cang cuahmah mi hna nih hmailei kan ram le Chin ram muisam zong tampi in a sersiam te lai.

Number 1 cu MAH rallokap pawl kan tei khawhnak ding ttanti cio ding a si. Cutin ttanti in thazan chuahkhawhnak ca ah zeitin dah kan ttanrual lai? Zeitin dah lungrualnak a chuah kho deuh lai timi hi abiapi ngai.
A lamkip in doh cio a si. A biapi dih ko. A sau tuk lai caah a tu nai te CRPH/NUG nih an thanhmi PDF (People Defense Force) le Chin ram myone kip ah dirh thar mi CDF pawl kong tawi nawn in langhter ka duh.

CRPH/NUG nih Kawl ram cu Federal Democracy ram ah kan ser lai tiah zapi theih in an thanh. Kan nih tlangcungmi pawl ca hrimhrim cu a tha tuk. Cutin an thanh lawng si loin, state government pawl zong Federal phun in mah le state cio nih rak ser cio dingin an i timhtuah. A biapi ngaimi a si. Hi lio ah khuacaan boruah le a herh tuk cang caah myone kip ngawt in CDF cu rak dirh cio a si. A cheu myone hna i CDF pawl i ca thanh zoh tikah direct in NUG he kan i pek lai or NUG Defense Minister kut tang ah um dawh in ca an thanh. NUG nih sermi PDF le Federal army he direct in i pek ding phun a si.

Hi kong hi thutdeuh in khua kan ruah a herh ko rua. Myone kip le peng kip ah a herh ningin le a herh ruangah CDF dirh cio a si i a tha tuk. A herh tukmi a si. CDF hruaitu tampi cu CNA ah training kai mi hna an si. CNF zong nih cathanh cu a chuah lo nain an theihpi hna, a kenkip in tha an pek, an bawmh hna. A si nain, Chin ram ah hriamtlai kan ngeihmi CNF/CNA a um ko buin, Kawl central cozah nih Chin ram ah Chin mi he hriamtlai phu a dang te an dirh/ or drih ciami an kut tang ah an chiat ahcun, Federal muisam he aa ralchan mi practice a si.

NUG nih timhmi Federal army cu State kip ah a um ciami hriamtlai phu hna he ttanti in an mah Kawlmi hraimtlai phu zong ser ve i kan zapi ral a simi MAH TAPUNG ral kha kan dohti ding kha an i timhmi a si. Hihi thil kalning a dikmi zong a si. NUG Defense Minister U Yee Mon zong nih Australia ummi CRPH support group pakhat he biaruahnak ah hiti ning tein a chim. Cutin a um ciami hriamtlai hna he ttanti loin an mah Central cozah nih direct in state dangdang ah hriamtlai phu an ser ahcun hmailei cah tihnung ngaimi thil a rak chuahkhawh.

A tu Chin ram ah myone kip ah a rak chuahmi CDF hna hi NUG nih direct an pom i an kutttang ah an chiat ahcun hmai lei ah kan mah le kan mah chung lila ah buainak le ral i dohnak tiang a chuah khomi a si. Shan ram ah RCSS le SSPP pawl an mah le an mah an i kap cuahmah ko.

A tha bikmi cu a tu CDF pawl nih direct in NUG he kan i pek lai an ti hmanh ah NUG nih cohlan loin CNF/A he rak i pek uh. NUG cu CNF/A he kan tuanti lai tiah rak ti hna sehlaw hmailei caah a tha lai. CRPH nih Kawl ram nitlak lei cu CNF nih tuanvo lakding tiin lungtlingnak an ngei ciami a si. Ruahdingmi cu NUG nih Kachin ram or Ka ren ram ah anmah duh in hriamtlai phu an ser ngam lai lo.

Kawl le miphuin dang training rak kai le hmunhma rak la chun, sakhan rak chiat chun pawl khi cu a pawi lo. AA pawl zong Kachin ram chung ah an um ko. A si nain, Kachin ram ah an mah Kachin miphun hriamtlai phu a dang va serding cu KIA nih an pom hrimhrim lai lo. NUG cu Central nih control tuahmi a si (phun dangin chim ahcun Kawl miphun nih control tuahmi a si) caah hmailei ah kan mah chungah buainak le lungrual lonak tampi a chuahter khomi a si. Miphun siaherh nak he By-Pa Hmun

Be the first to comment

Leave a Reply

Your email address will not be published.


*