Hawi le hna CNA nih khuabawi an tlaihtik hna ah lau hlah uh, sual zong phaw fawn hna hlah uh.

Hawi le hna CNA nih khuabawi an tlaihtik hna ah lau hlah uh, sual zong phaw fawn hna hlah uh.Khuabawi pa kha CDM a tuah lo ruangah le ralkap rian fial mi a tuah peng ruangah hi thil a cang mi asi kho.

Khuate khuabawi ralkap he ai pehtlai mi le ralkap rian fial a tuah mi cu an rau lai lo. CNA lawng nih hma an la lailo, Chin ram pengkip CDF mino nih hmaa an laak te lai.

Ralkap nawl maw an zulh lai, mipi duh mi CDM dah? Ralkap bantuk tein tlaih kan thiam, thah zong kan thiam.I ralring Didor

Karh Ter Lo Ding Mi: Nu le pa, u le nau, hawikom vialte hna, khrihfabu tuanbia kan zoh tik ah Khrih dawtnak le khamhnak thawngttha bia karh ter kha aa dawh ngaingai mi a si cu hngalh dih a si. An rak hrem deuhdeuh hna, Khrih thawngttha cu a rak karh deuhdeuh ve, cucaah nangmah le keimah zong Khrih a dawtnak a hngalmi zumtu kan hun si khawh ve nak hi a si. Karh ternak ttha a si. Asinain atu lio Kawlram huap in harnak, fahnak, zatlak puicimhnak, le thihnak kan ton lio caan ahhin rawiphiarnak lei, bia a karh tertu si cu a ttha lo bik a si. Ttih a nung tuk. Innchung khar, ule nau, khrihfabu le miphun karlak ah huatnak a chuah ter i a kan cheuhmal tu hi, dalan rian ttuannak ruangah a si te lai.

Ciam-mam te in, phaisa duh le min langh duh le aana duh ruah ah dalan a si mi an um ngai, an um chin thluahmah kho mi a si. Mibu nih kan rak zumh i rumnak lei ah maw fimnak lei ah maw kan rak bochanmi hna hmanh kha dalan tumpi an si kho ko. Dalan thil zamhnak, thawng karh ternak ruang ah a sual lo thisen (innocent blood) a luang te lai. Cun kannih Chin miphun hi kan lung a thiang tuk tawn, hihi dawh ceo phunkhat a si ve; bia hi chim ding a um, chim rih lo ding an um; ruak humhnak ah maw asiloah phone le fb ah maw kan theih mi paoh ttial kan hmang, cucu fim lo ruang ah le ralrin lo ruangah dalan phun rak si ziar a fawi tuk mi a si.

Atu lio Covid-19 zawtnak rungrul, pulrai hrik a karh ning a ran tuk tik ah i thlawp manh lo in minung tamtuk kan thi cang. Kawlram le bang cu aho vial dah zawtnak hrik nih a phakmi kan si ti hmanh kan i hngal kho ti lo. Covid-19 hrik a karhmi nakin a rang deuhmi dalan pawl thawng zamhnak le karh ternak nih a kan thah cuah mah; a poi taktak.

Dalan zawtnak caah i thlawpnak sii a um lo; thisen a luan ter i huatnak a karh ter. Chungkhar, khuami, khrihfabu, le miphun ningzahnak nganpi a ton ter. A ziah, holh hi kan i suum ko hna lo ee; dai te in um hi a cawn bak in kan cawn ko hna lo i? Dalan ruangah kan dawt tukmi kan fale thisen a luan lai kha kan ruat lo maw? Har kan ton lio ah dawtnak le khamhnak thawngttha tu karh ter, khat le khat nun i hrawm i i bawmh ding tu a si. Dawtnak in ramleng um kan unau hna le khrihfabu hna nih nan kan bawmhnak cungah kan i lawm taktak; hi lila zong hi a hmurka a tam tuk sual ahcun, nun aa thaap mi kan mino hna tlaih khih tonnak le thihnak tiang a chuak kho mi a si.

A zei kan ti hnga, Bawi Jesuh zong nih a rak kan cawn piakmi, “Kan orh lei kut nih thil ttha a tuahmi kha, keh lei kut hmanh theih ter lo ding,” timi nunzia dawh kha tutan ko ahhin hun i nunpi cio hna usih. Laitlang le Chinmi khuasaknak Kawlrawn ah meithal a puak cang i a hlei khun in kan hmur kan i suum a herh; dalan pawl ral khan kan i ralrin thiam an hau. Dalan kan um sual zong ah rianrang in Pathian le miphun sin ah ngaihthiamnak hal in dalan sinak peh zulh ti lo ding a si. Voi hnih kan nu paw chung in kan chuak cio lo i, voi hnih kan thi cio fawn lai lo: nan tuanbia, ka tuanbia ah anih cu dalan a si ee ti cu i fah sak bik ding, uar lo bik ding a simi a si. Hlan kan pipu hna chan ah fir le lichim an rak i nautat bik bang, dalan si kan i nau tat bik ve hna lai. Ralrin lo ruang ah dalan bang thawngpang karh ter tu si lo ding kan i ralring fawn hna lai.By-Lal Pek Lian

Be the first to comment

Leave a Reply

Your email address will not be published.


*