Hakhathar ah Pi Ni Can Meithal Kuan nih a Khen

Nihin zaanlei ah Hakhathar ah lam aa chokmi Pi Ni Can (kum 33) cu meithal kuan nih a khen, tiah thawng kan theih.

Hakhathar ah meithal puah thawng a than lio ah Pi Ni Can lam aa chawh caan he aa tong i meithal kuan nih a rak khen sual hi a si.

Hakharthar sang mi pakhat nih, “A phei ah a khen. Asinain, a hliamhma a fak lo i thinphan awk a um lo,” tiah a chim.

Ahote kahmi meithal kuan nih a khen timi fiang in theih a si lo. The Chin Journal May 18, Hakha

Chin Thuamthil Nih Bia A Chim.Mithiang Paul nih “Thawngttha cu ka zahpi lo,” tiah Khrih khamhnak thawngttha kong ah tehte a khaan (Rom 1:16). Pu Hrang Nawl nih Jesuh dawtnak kong “Ka Zahpi Lo” timi lenhlawi phun in ca a rak khawmh suat i a rak ttial mi nih kan kokek nunphung chung in Khrih dawtnak kong a hlawi mi duhnung tuk in kan rel khawh. Nizan tihni ah ruah lo pi in kan Chin thuamthil nih vawlei cung ah bia a hun chim, Pathian thangtthat bu in “Kan thuamthil te aw, miphun lakah kan in zahpi lo ee” kan ti ve cio ko lo? Hakha ahhin France in NGO lei rianttuantu nu a um i kum kul leng pi kan sin ah khua a sa cang.

Kan nu le nih Lai thil an tahmi a zoh, kan Chin thuamthil dangdang hna zong a zoh lengmang tik ah a rak chim an timi cu: “Hi aa dawhmi Lai thuamthil nih hin zeitluk in dah nan nunphung a san ti kha a langhter,” tiah a rak kan fak (comment) piak. Kanmah le kanmah kan kong kan i chimmi nakin midang nih an kan lawmhpiak thiam tik ah aa dawh ngaingai mi a si. Kan lungthli te in kan thuamthil cu Bawipa pekmi a si tiah kan hun uar khun. Kan Chin tuanbia a kherhlai mi hna nih zeitindah kan thuamthil hi a hun i sersiam ti mi kong ah ‘mang in khuachia nih a rak hmuhsakmi,’ a si ti phun in chimnak zong a um ve rua i cu ruang ah cun nihin ni tiang hmuhning a thiang set lomi, khuachia thuamthil bak ah a ruatmi zong pakhat pahnih cu kan um ve rua.

Nan theih cio dih bang in Khuachia asiloah Satan tham nih cun Bawi Jesuh hmanh pei vawlei cung tlangsang bik ah aa kaipi i na khuk i bil law ka bia, pennak vialte hi ka ta a si, kan pek lai tiah a rak lem bal ko cu! Bawi Jesuh nih nemte in Satan ka kal tak, Bawipa na Pathian lawng na biak lai tiah Cathiang nih a ti, a ti i a tei; vanmi nih an rak hnemh. Kan nun le sining vialte a kan thlengtu cu Khrih a si, a kan cawisang tu zong Khrih a si. “Vawlei le a chung i a ummi thil vialte hi Bawipa ta an si, vawlei le a cung i a ummi minung vialte zong hi amah ta kan si dih.” (Salm 24:1).

Kawlram in vawlei cung dawh zuamnak ah US ram a phanmi nu Thuzar Wint Lwin cu hmasa i a rak i timhmi Kawl thuamthil kha a caan a phak tikah a sin ah a phan kho manh ti lo i US um Chin mi nih Chin thuamthil (Chin National Costume, ti ve ko usih) an khaan piak i an thuamh, kan Chin thuamthil te i hruk in a kut te ah catar pakhat “Pray for Myanmar” timi aa ken i kan ram le miphun nih har a tonmi kha vawlei cung ah thlacam bawmh halnak in a langhter. Amah cu zuamnak ah 21 nak a hmu kho; aa hrukmi Chin thuamthil nih pakhatnak a hmuh.

Thuzar Wint Lwin le a timhtuahpi tu US um Chin mi hawikom vialte nan cungah kan i lawm tuk. Chin thuamthil te cu vawlei cung dawh zuamnak ah pakhatnak a hmu te lai ti cu aho hmanh nih kan ruah bal mi a si lo. Chin (Lai) thuamthil te cu ruahlo pi in Esther siangpahrangnu bang suiluchin chinh a si ve ai! Pathian cawisannak a si i zeidah Pathian nih a kan duh piakmi a si hnga? Hlasak thiam Pi Sung Tin Par nih Chin thuamthil phun tampi cu Kawlram huap in aw-an a ngeih ter ve i aa dawh i uarmi thuamthil pakhat (fashion) ah a rak sersiam cang. Cu hnu ahcun fitlaw Thet Mon Myint zong nih Chin thuamthil cu a hun laar te chin ve.

Cun naite (2019) ah kan fanu Esther Dawt Chin Sung zong nih Kawlram huap in hlasak zuamnak ah pakhatnak a kan hmuh piak i kan thuamthil kha a laar ter chinchin. CACC, Aidi, Pu Henry Van Thio, Rev. S. Van Hre, Pu Taan Ki, Lawngtlai lei kan unau hna, Hniang Hniang Kim, P. Cung Lian Thawng, David Lai, Benjamin Sum, le Billy, tbt, hna zong nih Chin thuamthil cu lungtho tein an i hruk, thazaang an pek i phun tampi in an ttamh chap. Daw Aung San Suu Kyi hmanh nih kan thuamthil cu dawh ngai in aa hruk ve. Ram hnihnak le ram thumnak a phanmi vialte nih miphun dawtnak fakpi in an ngeihnak a langhnak pakhat cu kan Chin thuamthil vialte an fale mino an uarpi hna, biakinn pumhnak ah an hrukpi hna i cawisan peng a si.

Hi ruang ah hin Kalaymyo, Gangaw le Laitlang khua tampi ah Chin thuamthil cu pawcawmnak ca tiang in an chuah, an zuar khawh i miphun iang an ngeih ter. Nizan tihni ah Kawlnu Thuzar Wint Lwin nih vawlei cung muidawh zuamnak ah Lai thuamthil aa hrukmi nih vawlei cung ah bia a chim: Kawlrampi Caah Thla Kan Campi u “Pray for Myanmar” tiah. Aziah Dr. Sa Sa le Dr. Lian Hmung Sakhonng hna zong hi Kawlram huap in thlennak caah an kan thim piak hnga? Aziah kan Chin thuamthil chung i pakhat a simi Lai thluamthil te cu vawlei cung dawh zuamnak ah bia a chim ve hnga?

Pathian nih duhsaknak a kan ngeih piak hrimhrim ve ko lai. Pathian duhnak kawl in thla fakpi in cam hna usih. Ka thlacamnak: “Mawi Bawipa, David sin na pekmi tthawnnak le raltthatnak, Esther siangpahrangnu sin na pekmi Nangmah bochannak, nawlngaimi sinak, le dawhnak hna cu pehzulh in kan hruaitu hna, nun aa thaap mi kan mino hna cu pe zungzal ko sawh hna. Kawlram pi nih luatnak hmuhnak ding caah Mindat khua in Chin miphun zong hi na lamkaltu ah na thim i na sersiam mi a si ve ttheu lai; tthawnnak, in khawhnak le teinak kan pe hram ko sawh.

Maw Bawipa, kan nih Chin miphun cu a milu rel in kan tlawm tuk caah pakhat hmanh tlawt-tlau lo in himnak kan pe ko sawh. Hmunkip i aa tthek mi kan si pin ah lungthin lei ah aa khat kho lo tukmi kan miphun hi Khrih chungah unau chuak tti bantuk in kan nun khawh ve cang naklai kan bawm ko sawh. Vawlei cung pi ah kan miphun thuamthil in bia na chim cang; Kawlram nih luatnak a hmuh khawh nakding ah hruaitu le hmunhma na kan thim piak cang- kan dirkamh law na duhnak le siter na kan duhmi kan theih ter hram ko sawh; aa porhlaw mi si lo in toidornak he nangmah an thangtthatmi na fale kan si ter ko; kan thuamthil aa dawhnak, fimnak nunphung na kan pekmi (fimnak ahhin dinnak le raltthatnak aa tel) cu fimkhur te in a nun kan cawm khawh naklai na Thiang Thlarau in lam kan hmuhsak zungzal ko sawh. Kan zeizong dihlak hi Khrih chung in tthanter ko sawh. Bawipa kan Pathian, na cungah kan i lawm tuk. Sunparnak le lianghngannak vialte na ta sizung zal ko seh! Amen.”Lal Pek Lian

Be the first to comment

Leave a Reply

Your email address will not be published.


*