Hakha sii-inn ah COVID-19 mizaw hmuh br Hakha sii-inn ah Cikha khuami sayama pakhat COVID-19 mizaw hmuh than a si, ralrin kan herh: Minister Pu Pau Lun Min Thang

October 10 zaan suimilaam 8:00 ah COVID-19 in a zaw mi a si, tiah Ngandamnak Zung nih a fehter mi Hakha sii-inn ah chiah mi Chikha khuami sayama pakhat hmuh a si than ca ah mizapi kan i ralrin ngaingai a herh, tiah Chin Ramkulh Cozah Social Affairs (Ngandamnak le Zaanglek) Minister Pu Pau Lun Min Thang nih October 11 a chim.

Amah hi Yangon ah Naungeihternak sianginn (Tha-phwu) a kai i a dih mi a si. Nu sii-inn ah caan zeimawzat rian a tuan hnu ah Chinram ah rian rak i thial ding in a rak tlung. An tlun ah hin COVID-19 phihkhar lio a si ca ah motor pakhat an hlan. Minung 4 an si. Hakha khualuhnak ah an chek hna i Chungkhar Riancawnnak (Indwinhmu) Zung ah Quarantine an chiahcolh hna. Amah lawng positive a si i a hawile 3 cu an dam ko,” tiah Minister Pu Pau Lun Min Thang nih The Hakha Times ah a chim.

Hi kong ah Hakha sii-inn-ukpi Dr. Zin Ko Ko Aung nih, “A zaw mi a si, tiah fehter cu a si cang ko. Hakha hi siikaan kan ngeih deuh a hau. Kan i ralrin lo ahcun kan i chawnhbarh dih ko lai. Ralrin tein um usih. Mask huh philh hlah usih! Kut i tawl peng usih,” tiah The Hakha Times ah a chim.

Cikha khuami sayama (min langhter lo mi) hi kum 23 hrawng a si. Yangon ah a um mi a si. Sianginn a dih i Chinram ah riantuan (Rian thial) ding in a rak tlung i check-gate (khualuhka) ah an chek hna i Indwinhmu Zung, September 27 ah Quarantine an chiah i, October 10 zaan suimilaam 8:00 ah zawtnak a ngei, tiah an fehter hi a si.
Credit- The Hakha Times Daily Newspaper

Be the first to comment

Leave a Reply

Your email address will not be published.


*