Hakha le Falam inn kangh ruang ah harnak a tong mi hna ca ah Hakha sangkip mino nih bawmh an hal lai

Falam Farthawk sang le Hakha Khuathar sang inn kangh ruang ah harnak a tong mi chungkhar hna ca ah Hakha sangkip mino dihlak fonh nih Hakha Mino min in inn khat hnu inn khat tlawmsuk bawmh halnak an tuah lai tiah theih a si.

Hi kong he pehtlai in tawlreltu chung in Salai Tluangte nih, Inn kangh ruang ah harnak a tong mi hna kaanghuhnak ca ah tiin Hakha khuachung sangkip mino tawlrelnak in khuachung ah inn khat hnu inn khat in tlawmsuk bawmhhalnak kan ngei lai. Bawmhhal kan timh mi zong hi Hakha ca lawng si loin Falam ca he Hakha ca he a si lai. Hakha ah bawmhnak hal kan timhnak a ruang zong hi ngaihchiat an ton ning a fah tuk tik ah i zuanhnawh cio le i bawmhchanh cio hi kan duh ca ah a si. Cun, Falam le Hakha cu i then awk zong kan tha lo, innpa zong kan si tik ah i zuanhnawh cio ko hna usih kan timi hi a si, tiah The Chin Journal ah a chim.

Hakha Khuathar inn kangh hi 2021 January 9 zaan suimilaam 11:30 tluk ah a si i, hi inn kanghnak ruang ah inn hlaang pakhat U Tan Win a nunnak a liam. Cun, hi inn kangh ruang ah a pawngkam inn hnih zong a ciam dih.

Cun, Falam Farthawk sang inn a kangh hi 2021 January 12 zinglei sang ah a si i, Rev. Mang Hlei Zing le Pi Rah Sung an nunnak a liam. Cun, a pawngkam inn inn ruk ciam dih lakin an kaang ve tiah theih a si.

Ngaihchiat va hromhpi a si lai ca ah nulepa mizapi hna zong nih nan kut nan rak kan sampi cionak lai zong kan in nawl hna. 2021 January 18-24 tiang sangkip mino nih nan inn cio ah an rak in kholh te hna lai. Ks.100 te na thawh zong ah Hakha khuapi kan fonh dih a si cun an ca ah thathnemnak tampi a chuak ko lai, tiah Salai Tluangte nih a chimchap.

Falam le Hakha inn kangh ruang i harnak a tong mi hna ca ah tiin Thantlang khuapi mino zong nih tangka an kholhpiak hna i a tangkafang in sing 35 leeng a chuak. Hi sing 35 leeng chung ah Hakha ca ah sing 12 le Falam ca ah sing 23 leeng tiin an thenphawt hna tiah kan theih. (By: Phun Sang)Laaknak -The Chin Journal

Be the first to comment

Leave a Reply

Your email address will not be published.


*