Hakha BEHS No.1 in CDM saya/ma pahnih Non-CDM than, an dihlak 5 hrawng an si

The Hakha Times, May 25 Hakha sianginn lak ah a ngan bik pakhat BEHS No.1 in siangcachim CDM a tuah mi saya/ma pahnih cu an i leet i Non-CDM an si than, an dihlak 5 hrawng an si, tiah kan theih.

“BEHS No.1 ah hin siangcachim le riantuantu 99 hrawng kan um. Cu hlan ahcun saya/ma 3 lawng hi CDM a tuah lo mi an si i nizaan naihrawng khan minung pahnih cu Non-CDM an si than. Annih pawl hi pension a la deng cang mi pawl an si. Sianginn zong anmah tein thianhlimhnak an tuah, tiah kan theih,” tiah CDM saya pakhat nih The Hakha Times ah a chim.

BEHS No. 1 sianginn lawng si loin sianginn dang zong ah CDM a tuah lo mi siangcachim cu mitlawmte lawng an si. Sianginn hon le kai lai caan a si ca ah i leet in Non-CDM a tuah mi an um pah len, tiah kan theih.The Hakha Times

Harnak le sunghnak pahchih in teinak hmutu Miss Universe Myanmar Thuzar Wint Lwin nih a chimmi bia pakhat

Tutan Vawleicung ramkip muidawh zuamak ah Myanmar  aiawih in aa zuammi le costume laksawng cotu Thuzar Wint Lwin cu US Chinmi mi zeimaw he tonnak tete an ngei len cang.

Ngakchia in upa tiang nih bia an hal. Bialeh aa harh bikmi cu tulio Kawlram dirhmun kong a si.  Amah lei in mipi sin ah a chimmi pakhat ka uar ngaimi cu,

” Sunghzatlaknak na ton zongah hnu tawn hrimhrim hlah. Naa tinhmi phanh khawh i zuam ko” tiah a ti.

Kan theih cio bantuk in Thuzar Lwin cu harnak phunphun le ram buainak lakah  Miss Universe zuam dinh in US ram a phan. Zuamnak aa hruk ding mi a thil design thatha an tuahpiak mi pawl a tlau. A bag in a tlau.  A caah chimpit bak a si i zuam loin ngol khawh a si. A thil a um lo caah. A sinain a sung a khang bak lo. Hnu a tawn lo.

A ngeihmi pakhat hnih tein lungdong lo tein a dih tiang aa zuam tualmal. Miphun thilthuam zuamnak zongah zeidang thilthuam a ngeih ti lo caah lakhruak in Hakha thil aa thim than i cu Lai thil he cun teinak a co ai.

Thialthuam zuamnak zongah catar tlaih ding pahnih le pathum an tial piak nain “pray for myanmar” timi aa thim. Cu ca tar le Kan Lai thil nih Vawlei a hnin dih ai.

Hi nu nun ah cawn ding cu zeibantuk harnak kan ton zongah lungdong lo in kan i tinhmi Kawltung zoh in kar hlan a herh.  Kan ngeih lomi le a um lomi thil ah buai si loin  kan ngeihmi thil  hmanthiam a herh zia a kan cawnpiak. Vawlei kan nun chung kan duh ning in thil an cang tei lai lo caah harnak ton ah a tlu colhmi kan si lo a biapi. Harnak timi cu hrial awk tha lomi thil a tei tu in tei ding khi a si.Credit-Tluang Ceu Thang

Be the first to comment

Leave a Reply

Your email address will not be published.


*