Fianmi Ruahnak

Chin Miphun cu Burma, Shan le Kachin Miphun hna he Union of Burma dirh ding in 1947 Feb. 12 ah Panglong Agreement Kan rak tuah i 1948 Feb. 4 ah Union of Burma cu independent pek in Kan rak dirhmi ram a si.

Independent a hmu cang Laimi Ram a si caah ram Uknak Phunghram Sernak caah Aung San nih U Chain Htun timi pa a rak hruai ter i Ram Uknak Phunghram cu an rak ser. (Ramuknak Phunghrampi Sernak ah Panglong Agreement a rak tuahtu Tlangcung Miphun an rak sawm hna lo).

Cu tlawmpal ah Aung San an rak thah lawng silo in 1947 Ram Uknak Phunghram chungah Kawl Miphun nih central nawl ngeihnak vialte an lak dih i Tlangcung Miphun vialte kha an Kut tang ah an Kan chiah dih tikah 1949 ah Rampi Ral a tho. Atu tiang a dai bal lo. (U Nu- AFPFL Party 1948)

1947 Ramuknak Phunghram cu ningcang lo in Kawl nih nawl ngeihnak an lak dih tikah hihi cu zohthan a herh tiah an rak ti i Taunggyi Conference (1960-1961) an rak tuah. 1947 Panglong Agreement ning in Uknak nawl an Kan pek Duh ti lo ruangah Ramkhel Kong buainak a chuak i Ralkap nih Nawlngeihnak an rak lak. (Ney Win)

1960-1961 Taunggyi Conference ah Ralkap nih nawl ngeihnak a rak laknak a sullam taktak cu Kawl Miphun Kuttang in Tlangcung Miphun vialte luat Lai an phan/Duh lo ruang ah a si.

Ralkap Uknak tang um kha an Mah Kawl Lila nih an celh ti lo i Zaukphung khel hram an hun i thawk. Mah hmanh ahcun Ralkap pension pawl an si. Democracy phung kha mipi thinlung ah hmunhma a Lak cuahmah tikah Ralkap Uknak kha an huat chin lengmang i 1988 ah Mipi le Ralkap karlak ah buainak fak taktak a chuak.

1988 buainak hnu cun Kawl Miphun party ah Democracy phung an khel Thai i Atu tiang zong ah an khel chuahmah ko. Kawl nih cun Democracy dah ti lo an khel dingmi a um lo.

Union of Burma tuanbia hi a hram tein domh ahcun Tlangcung Miphun nih Kan covo lakthan ding ah Kum 70 leng Kawl Miphun sinah Nunnak thaap in Kan rak khel cangmi a si. Atu tiang zong ah a lamkip in khel cuahmah a si. Chin Miphun Kan caah cun 1947 Feb. 12 ah Panglong biahren Kan ngeihmi dah ti lo khel ding le tanh ding dang Kan ngei lo.

1988 in tuanbia Rel Kan i thawk ahcun Kawl Miphun kong ah Kan taang ko Lai. Atu tiang ahcun Kawl Miphun hna he Kan Khelmi aa lolo i Kan i tinhmi zong aa khat lo.Kawl Miphunpi ruahnak a ngeitu pawl ruahnak- King Anawrahta chan in Kan Kuttang nan si cang.

Tlangcung Miphun dawtu ruahnak- 1947 Feb. 12 ah Panglong Agreement Kan tuah ti i 1948 Feb. 4 lawng ah Ramthar Kan dirh. Kawl kuttang Kan si bal lo.

Hi bantuk ruahnak an ngeih ruang ah Ram Hruaitu an i thleng lengluang ko nain an Kuttang ah an Kan chiah peng nak hi a si. Chin Miphun zong nih hi ruahnak Kan fian ve a si ahcun Miphun tanh lo in Kan um Kho ve hrimhrim Lai lo.Credit-Tinthe Thang

Be the first to comment

Leave a Reply

Your email address will not be published.


*