Fanthen Khuami nih India Rammi Mi Thalo Damiah pahnih an rak tlaihnak kong

1990 Kum facang ah lio hrawng ah Hniar Tung le Pa Nga timi mizoram hrawkhrol hna cu Lautu peng lei an hung phan. Thanghor kam leikung ah an riak. Vainam he an si, khuami rangtum an fir i an i cit. Vainam in lei akalmi tar pakhat cu an thihphaih, thah an zalh. Fanthen khua ahcun midang hna lo kal kar ah an phan i an vainam he cu an duh in an tlong, an duhmi thil an fir, an ding an ei. Khuami thin phan thlalau in an tuah hna i, Nu hna zong an dehdai hnik hna ti asi. An sualnak cu khua tlangval le upa hna nih an ceih tik ah sual a luanmi asi, damiah phun in an um ti kha an i fianh.

HniarTo cu a pum rua veitia pi asi. Akhan asang. Vainam he a um tik ah a muisam hro akual. A hnuzul Pa Nga timi zong vainam he asi ve.

Cuti cun, Fanthen tlangval hna nih cun, cu mitha lo damiah pahnih umnak an inn cu an tlaih dingin an kulh. Meithal he hriam he nam he an chuah hnawh hna i cu damiah pahnih cu an ttih tuk i khua taw ah lam lo in an rak zam.

Cu lio ah Fanthen tlangval Thla Tu, le Rung Bawi hna tiin an hruai hna. Cu lio khua Okathah simi Zung Iang pa nih khua mi pa poh poh cu a kawh hna. Pu Hei Ling pa timi hi hlanchan ralkap penson asi, amah zong nih cun heh tiah tlang a au i khuami tlangval le pa pohpoh an rak i pum dih i, mi tha lo hna cu dawi i  tlaih ding cu an i zal.

Lungcuai pi khua lei ah an kai tiah an theih in, Lungcuaipi khua ah cun Fanthen tlangval rual nih cun an kal hnawh hna. Thalphir, cehpuah, vainam le namtong he ralkap rual bang khin! An lung aa rual i, damiah cu khan bang in an hnawh hna.

Zan ah cun Lungcuaipi khua ah an kal hnawh hna. Cu khua ah cun an rak lawr i, duhpoh an um ve. Cu khuami nih an rak ttih ngai hna. An umnak inn cu meithal he hriam he an kulh i, an tlunnak in ah cun Fanthen tlangval hna nih cun, an luhhnawh i an tlaih ko hna. “Hniartung le Panga rak chuak tuah uh!!” Pasal nan si ah cun a leng ah rak chuak tuah uh!! tiah an kawh hna. Chiandeih aw bang a tlerhmi nih cun, Mizoram ah a lawr bakmi damiah pahnih cu chizawt bang an thlep ter hna. An luh hnawh hna i Hniar Tung cu a hnar tlek lak in an phomh. Panga cu a vianam a chiah i a sung khan. An khuk an bilter hna i, thih ttih ah, a sung an khan. An nunnak hi lafang tia lawng a rak tang.

An liang an leh hna i, Fanthen khua lei ah an rak kirpi hna. An angki an phoih hna i, an underware lawng in khuachung ahcun ah an auter hna. Mizo holh le lakher holh in “A kan tlaih ee, Misual kan si ee” tiah lam thluan an auter hna. Pa poh poh nih an sualman caah an chimh hrin hna i, Fanthen khua Ohsuh zung ah cun hri in an hren hna. An thi he hnai he, an hnap he minung ko an lo ti lo. Baptist nubu hna nih rawl an pek hna i thla an camh hna ti asi. Athaizing ah Hmawngtlang palek kut ah aap an si. Cun, Mongywa thonginn ah kalpi an si. Monywa in 1991 kum ah India-Mizoram cozah sin ah aap than an si. Hniar Tung cu thonginn ah a piangthar evangelist ah aa cang tiah theih asi.

Kum 5 hrawng a roh hnu ah Hniar To a naupa EyDoh a rak chuak thani, a van chia ai, Fanthen khua thiam thiam ah tlaih a tong than.

Theihternak  Mah hi tuanbia hi 1990 kum ah arak cang taktakmi mithmuh le kutongh in atheitu eye witness hna nih an chim chinmi – ca in tialthan mi asi.By-Salai Biak

Be the first to comment

Leave a Reply

Your email address will not be published.


*